Ka jingthmu ban shna iew ha Mawlai mawroh kan pynjulor ia ki tyllong um:SD Khongwir

Shillong: Ki dkhot jong ki 16 tylli ki shnong ki ba hap ha ka Mawlai Town Dorbar mynta ka sngi, ka la leit ban ai dorkhas ia u CEM ka Khasi Hills Autonomous District Council u bah TItostarwell Chyne ban pynpaw ia ka jingpyrshah ka ba jur halor ka jingthmu jong ka KHADC ban shna ia ka iew die lang ha Mawlai Mawroh kane ka long namar ba lada ki shna ia ka iewdielang ha kane ka jaka kan pynjulor ia ki tyllong um ki ba don haka ne ka jaka.

Ha ba iakren bad ki lad pathai khubor na ka liang u President ka Mawlai Town Dorbar u bah S.D Khongwir u la iathuh ba na ka liang ki 16 tylli ki shnong kiba hap ha ka Mawlai Town Dorbar ka pyrshah jur ia ka jingthmu jong ka KHADC ban shna ka iewdielang, namar ba kan sa ktah ia ki jaka ki ba don ka jingiadei bad ki tyllong um ki ba bsa um bam umdih ia ka shnong Mawlai baroh kawei. U la iathuh ba lada ka iew kan wan ha ka ne ka jaka kan pynduh noh ia ki tyllong um ha ka ba ka um ka wan na Lum Mawpat bad iaid sha ka jaka ba ring um ha um Sohlang bad ka jingthmu jong ban shna ia ka iew kan pynjulor ia kine bad lada kan ktah ia ki tyllong um ha kine ki jaka da lei lei ruh kin ym shah ba kin shna iew. U la ong ruh ba kum baroh ki tip ba ka iewduh mynta ka la long ka jaka ka ba la jyrsieh ki kam sniew ha ka ba la da ki shna ia ka iew sa ha Mawlai, kan pynsniew ia ki shnong ki thaw ki ba iajan bad ki ja ka ba thmu ban shna iew.

Na ka liang ka Mawlai Town Dorbar ka la pynpaw ruh ba haduh mynta ha ka Shnong Mawlai kim ju shah ban shong wai ne ban wan sah ki bar jylla, bad ka jingthmu ban shna iew ha kane ka jaka ka lah ban wan rah ia ka jingwan buhai shnong jong ki bar jylla ha kane ka iew namar ba wat mynta ruh ha iewduh ki ba long trai ki dei ki bar jylla, kumta na ka liang ka Mawlai Town Dorbar kan pynshah jur ia ka ne ka jingthmu ban shna iew ha kane ka jaka .

Na ka liang u CEM ka KHADC u bah Titostarwell Chyne, u la iathuh ba ka jing leit jurip ha ka 29 tarik u Jymmang 2020 ia ka shnong Mawlai Mawroh ka long tang ban leit jurip ba kine ki jaka ki long ne em ban shna iew dielang.