Ka jingthmu ban hiar na ka post President ka long kaba sngew thamula bad kaba ialam bakla, namar ka seng bad kumjuh ruh ka ECI kam ithuh ia u kum u president

Ha kaba iadei bad ka jingpyllait khubor jong U Bah Adelbert Nongrum, MLA ka KHNAM haka 14 June 2022, ka seng kadon ban pynshai kumne harum:-

Ka seng kala iakynduh ia U Bah Adelbert Nongrum haka 25 March 2022, da ka jingthmu ban poi sha ka jingsngewthuh jingmut bad ha kane ka jingiakynduh, ngi la dep ban iakren shai bad ia rai lang “ba donkam ban ia sngewthuh shwa ia ki jingbakla baroh khnang ban poi sha ka jingiasuk bad jingbha”, bad ngi la ai por kham kylluid ruh ban puson. Hynrei kaba sngewthamula ka long ba naduh katei ka sngi, kam don shuh kano kano ka jingiakren/jingiakynduh bad ngi shu iohi ba u pynbna lyngba ki lad pathai khubor, ba un hiar shuki noh naka post President bad u la wer ia ngi ban poi sha ka jingialang ha iing sah jong u ha ka 17 June 2022. Ka jingkylli kaba mih ka long kumno un hiar shuki President haba ka ECI kam ithuh ia u kum u President. Kum ban shu pynkynmaw, ka ECI shwa ka Mawryngkneng bye election, lyngba ka shithi kaba 20 Oct 2021 ka la pynshai biang ba kam ithuh ia U Bah Adelbert Nongrum kum u president ka KHNAM bad dei namar kata ba u kyrtong ba u la pynieng u khlem ioh lad shuh ban iakhun na ka seng KHNAM.

2. Hadien ka jingiakynduh kaba 25 tarik ngi la khmih lynti ba kan sa don ka jingiakynduh ban iakren bad ngi la iai ap ia kata ka khubor hynrei ka khlem poi satia. Ha ka jingshisha, ka kam iing ladei ban pynbeit shwa ha iing ym ha surok lane ban shu pynmih khubor ia kaei kaei ka bympat seisoh.
3. Naduh u snem 2019 haduh mynta ngi la iohi ia ki jingkren ialam bakla jong U MLA lyngba ki laid pathai khubor, ia kaba ngi khlem sngewdonkam ban pynshai bad mynta ka kynti ruh ka la urlong kumjuh, bad lehse kan sa donkam ba ngin hap ban pynshai khatduh khatwai ryngkat ki sakhi satar baroh. Ha ka MDC election 2019 ngi la pan jingmut, hynrei la shu shim tang ia ka por khlem ka jubab bad khatduh khatwai u la niat beit sha ka CEC, bad la pyndep ia ka kam katkum ka riti treikam ka seng. Ki rai ki khlem kylla pyrdet hynrei ki la iaid beit katkum ka jingsoi jong u MLA ha ka report jong ki observer ka election committee. Ka long thamula ban ioh sngew ba U dang mut ban mih ka KHNAM-A bad KHNAM-B, hato ym dong jingtip seh kaei lynti ban leit form party thymmai bad kaei ka lynti ban leit kam President sopsop? Shwa ban leit sha ECI u MLA u la lum ia ki EPIC jong ki 100 ngut ki paidbah bad leh Affidavit bad la thoh ba kine baroh ki la jied President thymmai ia u, hynrei kine baroh kim tip haei la pyndonkam bakla ia ki EPIC jong ki ruh. Wat kiba paw kyrteng ha ka CEC jong u MLA ruh kim don jingtip eiei, ia kane baroh ngi lah ban pynshisha.

Kum ka seng ngi pynpaw ka jingsngewlyngngoh bad ngi kylli na U Bah Adelbert “Katno sien phin resign na kajuh ka seng?”. U la resign kum U Working President bad dkhot ka CEC lyngba ka shithi kaba 10-07-2018, kumno pat u kiew kyrdan sha ka post President? Bad mynta pat u kwah resign biang, kaei ka jingmut bad ka jingthmu? Ka long kaba eh ban sngewthuh!. Ka long ruh kaba lyngoh ba ha kajuh ka por u la file case biang sha Meghalaya High court (ia kaba u khlem iathuh paidbah) bad ha kajuh kapor u kwah kren iasuk. Kaei kane?

Ngi iohi ba haduh mynta ka dang mih ka jingkren na U MLA ba ka “ECI ka dang ithuh ia u kum U President’ bad kane kadei namar ba kam don ka jingshemphang lane jingsngewthuh ia ki shithi kiba u la ioh pdiang na ka ECI bad kam don ruh ka jingsngewthuh balei ba u Kyrtong ba u la pynieng na Mawryngkneng u hap ban iakhun independent?

Kumta kane ka jingthmu ban hiar na ka post President ka long kaba sngew thamula bad kaba jingialam bakla, namar ka seng bad kumjuh ruh ka ECI kam ithuh ia u kum u president.

Ka jingkren jong U Bah Adelbert “ba haka 25-03-2022 ka don ka jingdawa ban hiar shuki president ia u, ka long ka bymshisha bad ka bymdon nongrim, namar ba ha kane ka jingiakynduh ka phang ka long ba donkam tang ban sngewthuh shwa ia ki jingbakla khnang ban poi sha ka jingiasuk. Namar kata kum ka seng ngim lah ban pdiang ia kajingkhot kaba ngi ioh lyngba ki lad pathai khubor khlem kano kano ka jingiakut.

Kane kam mut ba kan ym don ka jingiasuk nangne shakhmat, hynrei ka jingkhang ka plié. Ban pynurlong ia kane ngin sa phah ka jingthoh kaba biang ryngkat ka jaka ka tarik bad ka por kaba kylluid bad kaba ia biang lang sha U Bah Adelbert Nongrum khnang ban ioh ban ia phylliew jingmut bad ngi kyrmen ba yn da la mih na kane ka jingiakynduh ngin ioh ia ka khubor ba thiang naka bynta ka jingmyntoi ka seng hi baroh kawei.

Bah Pyndap Saibon,
President KHNAM,
Central Executive Committee.