Bah RM Shabong
Ka jingjia ha Amlarem, ka la pyn kyndit thret ia ka sorkar Jylla, ha kaba lai ngut ki briew na kawei ka jaka iew, kin ioh ia ka jingpang khlam coronavirus bad katei ka la pynlong ia ka sorkar, ba kan rai ban ia test paidbah noh, ia katei ka khlam corona bad katei ka dei ka dak kaba sngew tynnad bad kaba sngew iahap, wat la ka sorkar Jylla, ka la kyndit, hadien shiteng snem eiei, ba ka la khie kane ka khlam.
Ka pisa ba la khlong na ki pla jong ki paidbah, la thied da ki kali kit nongpang, kiba shongdor kumba T.4klur tam, hynrei kitei ki kali kit nongpang, kin leit kit iano, haba kim tip haei ki don ki nongpang bad nangta ki jingkhang shnong, da ki bnai kynthih, kim shym la lah satia ban teh lakam ia katei ka khlam, hynrei ki la nang ailad pynban, ba kan nang khie jubor bad kitei ki dei ki jingjia, kiba sniewbok bad kiba la iai bteng mynta la jan shiteng snem kynthih. Ka don ka ktien kaba ong ha ka jing ialehkai phutbol “catch them young (lane pyndonkam noh ia ki, katba ki dang lung ka rta) bad ka sorkar Jylla, ka la dei ban sdang ia katei ka test, ha ka por, ba ka pang khlam, ka dang shu sdang ban pur ha ka Jylla.
Kam pher, mynta ruh ka don ka kyntien hi, kaba jynrat naduh dyngkhong bad kumta ka jingtest paidbah, ka dei ba ngi leit jynrat ia ka jingpang na dyngkhong bad kam dei kumba iaid iarieh u myrsiang bad ka tyut hyndai. Kam lei lei, ka jingleh, ka long kaba biang eh, hynrei ngin hap ban kynmaw, ba ki 71 tylli ki jaka ban ia test corona, kim dei ban pyndik ia u luk u lak bad ka jingtest, ka dei ban iaid kham stet, tangba ka dei ban don bun ki jaka bad ban test ia ki phew lak ngut ki briew, kam dei shuh tang ka kam jong ka sorkar Meghalaya; hynrei kan jin da la bha, ban ailad ia kiwei ki riew shimet ruh ba kin iatrei lem ia katei ka kam, wat lada ka dei ban siew ruh, kam don jingthut eh ia kito kiba lah bor ban siew pisa.
Ka mat kaba kongsan duh, ka long ba kan bha lada ka sorkar kan phah test nyngkong shwa ia baroh ki pulit, kiba don ha ka Jylla, nangta ia ki doktor, ki nos bad nangta sa ki nongtrei, kiba dei ban leit shabar ban test corona ia ki paidbah bad ka sorkar Jylla, ka la dei ban iaid da kajuh ka ban khang shnong shi kynta ar kynta bad leit ban test ia ki briew ha ki shnong jongki hi ba kin nym ia saphred, lane pynbit jingpang shawei pat.
Phi don ban ong eiei?