Ka jingtei, ka la jan dep lut, na bynta ka cancer hospital

Shillong:U Myntri ka tnad ka koit ka khiah u Bah Alexander L Hek, ula iathuh ba ka jingtei ia ka Cancer Wing la dep ban shna haduh 95 na ka 100, hynrei ia mynta hi, yn ym pat lah ban leh ia kino kino ki kam, namar ba ia katei ka jaka dang pyndonkam, kum ka jaka ban ai jingsumar ia kito kiba ioh ia ka jingpang COVID-19.

Haba ia kren bad ki lad pathai khubor, u bah Hek u la ong ba namar ba ki la bun bha ki briew kiba ioh ia ka COVID-19, la bthah ba dei ban pynkynriah noh ia kine ki nongpang. Ula ong ruh ba khnang ba ka jingpynkhreh bad jingpynbiang ia ka Cancer Wing kan iaid shakhmat bad yn ioh ban plie noh ia ka ka ban long ruh kum ka jingrakhe iaka jingdap 50 snem jong ka jylla Meghalaya ha ka jingioh ia ka jylla kaba pura” ong u Bah Hek.

U Bah Hek u la ong, kumba ka long mynta, baroh ki shu shaniah ha ka NEGRIHMS kaba don ia ka tnad Cardiology, hynrei ka jylla ka dang dong shadien ha kaba iadei bad katei ka tnad, hynrei namar ka jingbun jong ki paidbah kiba iap na ka Heart Attack, ka long kaba kongsan ban phaikhmat ha kaba iadei bad ka tnad Cardiology hapoh ka jylla.

U la ong ruh, ba ka jingeh ka jylla ha kaba iadei bad ka tnad Cardiology, ka dei ruh namar ka jingbym don ia ki briew kiba lah ban peit ne pyniaid ia ka tnad Cardiology.