Ka jingsurbe ka la iaid ban buh pulit ha ka thain khappud, ong u Conrad

Shillong: U Myntri Rangbah ka jylla u Conrad K Sangma u la ong ba la bthah ia ka tnad kam pohiing ban surbe na ka bynta ban buh police outpost ha thain khappud kynthup ha ka thain Balakhawa ha Ri-Bhoi.

Haba kren mynta ka sngi, hadien ba la iakynduh ia ka kynhun ki MDC ka KHADC ba ialam da u CEM, u bah Teinwel Dkhar, u Conrad u la ong , “Hadien ba laleh ia ka surbe, ngi la phah ban bishar ban buh ia ka Outpost ha katei ka thain bad kiwei ki jaka”.

U la bynrap, ba u MLA ka thain u bah Sosthenes Sohtun ruh u la iakynduh ia u myntri kam pohiing halor kane ka kam.

Ha kajuh ka por, u Conrad u la ai khublei kyrpang ia u bah bah Michaeal Warjri ba sah ha Balakhawa, uba la satar ban leit sah ha katei ka khappud hapdeng kiba bun ki jingtynjuh.

Ha kawei ka liang, ka kynhun ki MDC ba ialam u bah Teinwel, kila pynsngew ha u Myntri rangbah ban leh kyrpang ia ki briew ba sah ha khappud da kaba ai lad ba kin rejister ia ki jaka, khlem da donkam siew pisa khnang ban pynskhem ia ka jinglong trai ka jaka ia ka jylla.

Kila kyrpad ia u Myntri Rangbah, ba un iakren ia ka sorkar Assam ban wanrah noh ia ka mukotduma jong u bah Michael sha Meghalaya na Assam.