“KA JINGSNGEWSIH U NEHEMAIAH”

Dr. B.R. Marpna

Ka jingsngewsih ka long bynta kaba eh ban iatai namar ba ha ka jingim jong ngi ki briew ngi ju don ki jingsngewsih haba ngi ia kynduh ia ki jingeh la ka long ha ka jingim kaba shimet ne ha ki longiing ki longsem. Ka jingkmen ka long kaba donkam ba ngin ioh ne don ha ka jingim jong u ne kaba ngeit wat la ngi iashem ki jingiakynduh kiba ha rukom rukom jingiashem. Hooid, ka Baibl ka ju iai pynkynmaw ia ngi shaphang ka jingkmen. Kane ka jingkmen ka wanrah ka jingkylla kaba khraw ia u briew. Lada u briew u shait u khlain bha ha ka bor met bor phad, kan pynlong ia u briew ba un kmen namar ba u don ka jingkoit jingkhiah ha ka met. Haba u pang bad um shait, kane kan wanrah ia ka jingsngewsih. Haba ngim don jingkmen, kaba mut, ngi sngewsih bad ngi sngew jynjar bad pisa ka mynsiem.

Haba ngi phai na ka Baibl ha ka por jong u Nehemaiah, uba long u nongrah khuri jong u Syiem Persia ngin shem ba une u briew u don ia ka khmat sngewsih bad kane ka jingsngewsih ka la paw ha u Syiem Persia. Hooid, ka kam rah khuri ka dei ka kam donburom hynrei u Nehemaiah u don ka jingsngewsih bad um don jingkmen ha ka jingim jong u. Hooid, ka don ka daw ban pynlong ia u ban sngewsih bad kata ka jingsngewsih ka dei ba ka kynroh Jerusalem ka la twa. U sngewsih ban iohi ia kane bad ka la pynlong ia u Syiem ban kylli na u Nehamaiah. “Bad u syiem u la ong ha nga, Balei ka khmat jong me ka imat sngewsih, haba mem da pang? (Nehemaiah 2:2). U Nehemaiah u kren da kaba shai ba u angnud ban tei ia kane ka kynroh namar ba u angnud ia ka kam U Blei bad u sngewsih ia kaba dei haba ngi pyrkhat na ka bynta ka kam kaba bha. Kumta ka la pynlong ia Syiem ban phah sha Jerusalem ban tei ia kane ka kynroh. U la ioh ruh ka kyrdan Nongsynshar (Governor) hashuwa ba un leit sha Jerusalem da ka bor bad ka iktiar ba la phah da u Syiem.

Paralok ha U Trai Jisu, to ngin long kum u Nehemaiah ban angnud ba ka kam jong U Blei kan roi, ki mynsiem kin im bad phai sha U Trai bad haba ngi thmu ia ka kam kaba bha na ka bynta ka burom jong U Blei, U Blei un kyntiew kumba u la kyntiew ia u Nehamaiah. Ka jingkylli ba nga kwah ban pashat:

Hato ngi angnud ba kiba haiing hasem jong ngi kin ioh ia ka jingpynim?
Hato ngi angnud ia ka ri bad ka jaitbynriew kan phai sha U Trai?
Hato ngi angnud ba ka Balang kan pyndep ia ka Mission ba la phah da U Trai?
Hato ngi tip ne em haba ngi thmu ia ka kam babha, U Blei Um ju iehnoh?

Khublei shibun.