Ka Jingsneng Tymmen. (Na ka bynta ki Class X)

[ba bteng]

Babu Kular Khongjirem

Ka Lynnong kaba XXXIV. Ha kane ka Lynnong,u nongsneng u batai shai ba ka mon ne jingmut ba thmu ban leh ne rai marwei kam ju long satia.Donkam ban da wad ia ka jingmut jong kiwei de namar ka mon laitluid shi met ka ju ia lam bakla pynban ia kano kano ka kam.

Ka mon khlem pynshong nia ne pynshong nongrim bha ka thom pynban ia ka sang ka ma ruh.Haba phi leh da ka jingmut ne jingthmu da ka jingkwah marwei ka ju poi pynban sha kaba bakla.Kaba kham ma bad kham shyrkhei eh ka long ba, ka jingmut bad jingthmu shi met khlem da ia syllok lem ia ka jingmut kiwei ka lah ban iaid lait bad iuh roit ia ki nongrim ba buh ki longshwa man shwa jongngi.

Kum kine ki nongrim bad jingpyrkhat ban ioh jingmyntoi shi met ne marwei kan treikam bha wat ha ki khun binong bishon ne ki khun ba don burom surom jong ka ing ka sem ki briew. Ym tang ia ki khun binong bishon, hynrei wat ki khun ba heh ba hain,ki khun bakhraw ki khun ba tri kan shet shukor bad phon ha ban biang jai.Ka nud ban shet ban phon khlem salia shuh iano iano ruh.U myllung u mut hangne ba, ka jingkwah thok kwah shukor,ka jinglong ar sap ar phong,ka jingkwah khwan myntoi shi met bad ka jingkwah ia ki jingsniew ba lait phew jait ka kham jur pynban ha ki khun binong bishon,ki khun riew spah riew hajar bad ki khun ba khraw ba tri pynban.

Kumta,u kyntu ia ki samla pule bad ki longdien man dien ban long kiba sian,kiba husiar ha ka nia ne ban pynshong nongrim ha ka Hok haba leh ne trei ia kano kano ka kam ha kane ka pyrthei khnang ba ka Hok bad ka nia kan ieng wat ha ka por ba dang im haduh ban da iap ne khlad noh na kane ka pyrthei shong basa. Ki kyntien pynkut u nongsneng ki kyntu namarkata,ban kiar rai maw rai dieng na ka mon laitluid marwei.

Ym dei ban aili ia ka jingkwah brai bad ki jingpynshoi ba lai phew jait jong kane ka pyrthei ioh ka ialam pynban ia ka jingdiaw ne jingthud u Suidnia(u kni ba nyngkong eh jong ka kur),ka Iawbei(ka kmie ba nyngkong eh jong ka kur) ne u Thawlang (u kpa ba nyngkong eh jong ka kur).Lada nang ban leh hok,mut hok bad trei hok khlem ka jingshah pynshoi jong ka mom laitluid marwei, kan long kein ka jingkyrkhu ia u suidnia,ka Iawbei bad u Thawlang ba kin sngewbha bad sngewkmen kyrhai da ka jingkyrkhu jongki ha kane ka pyrthei bad wat hadien bym don shuh ha kane ka pyrthei ruh.(yn dang bteng).