Ka Jingsneng Tymmen. (Ka lynnong kaba XXXII)

Ba bteng ia ki Class X.

Babu Kular Khongjirem

Ha kane ka lynnong pat,u nongsneng u kyntu ia ki nongpule ba ki dei ban long kiba don akor don burom ha kiei kiei baroh.Kaba leh heh,leh meng,leh kor ia kiwei pat ka long khlem akor hakhmat ki para briew baroh.Ym ju bit ban leh kor,leh heh bad kren heh ia kiwei la ki long ki kur,ki kha,ki lok ki jor ne ki para briew baroh.

Ym ju bit ban ia bishni ne ia dom para shnong bad para ri lajong.Horkit hordang ruh kiar na ka jingpynshit lada don ka jingia kajia majia.Dei ban long ki nongpyn iasuk me wat iashang ne iajan ioh shah kynnoh ne kit pap ei khlem daw khlem nongrim.Ka long pop/pap ruh lada ngi ibein ne niew bein ia kiba duk ba rangli.Ban kynshi ne bynthiew ia kiba pang ne ba duk eh ym bit satia lano lano ruh ban leh kumta.

Ym ju bit ruh ban ‘kynkok’ne sngewkmen pynban haba kiwei ki ia kynduh ia ka nusip ba sniew la ki dei kiba iajan ne ia jngai namar,shisien ka sngi phin ngat lem sa maphi kham palat ban ia kaba jia kiwei.Haba kren ne haba leh ia kiwei,dei ban kynmaw ba, kaba jia ia kiwei, phi ruh, phin nym lait,hynrei ki juh ki jingjia ba kham palat kin wan jia sa ha ngi,namar ngi ruh ngi dei ki juh ki briew ba buh U Blei.Ka lain ka kren shai ba,’Mynno ba tang ia kiwei kan leit dei’.Ka nongkylliang ne ka bainong ba ngi dei ban ioh ka long katkum ki kam ba ngi leh.

Lada ngi leh bha ia kiwei,ngin ioh ka bainong kaba bha bad ka jingkyrkhu kaba khraw hakhmat u briew ne U Blei.Hynrei, lada ngi leh sniew pat ngin ioh ka nongkylliang bad ka bainong kaba snoh ha piew ne kaba kham palat ban ia kaba ioh kiwei pat.Kine ki lain u nongthoh ki kren shai ba “Ka nongkylliang ruh ka ju jia kylla,La ka long kaba sniew ne kaba bha”.Kane ka jingsneng bad jinghikai ki longshwa manshwa jongngi la pynshisha ruh da ka ‘Newtons’3rd Law of Motion” ha ka subject Physics kaba ong ha ka ktien nongwei kumne”In every action,there is an equal and opposite reaction”Ka pyni namarkata,ba,ki Khasi jongngi hyndai ki long kiba kham stad bad kham shemphang pynban ban ia ki scientists.

Ki riew stad ssians ki bud pynban ia ki jinghikai bad jingbatai ki longshwa manshwa jongngi kiba ngi ju ong ia ki ba ki dei tang kiba dang dum bad dang biej ha kane ka pyrthei shai mynta.(yn dang bteng next issue).