Ka jingslem ka UCC, kan ktah ia ki jingngeit tynrai jongngi, ong u Vice President

Shillong:U Vice president, u Jagdeep Dhankar mynta ka sngi u la ong ba ka Uniform Civil Code kan pyniatylli kham bha ia ka bharat bad ka jingieid ri bad u la ong ba “Ka jingpynslem shuh shuh, ban pyntreikam ia ka Uniform Civil Code (UCC) kan ktah ia ki jingngeit tynrai jong ngi.”

Ha ka jingai jingkren ha ka jingpynkup burom ba 25 jong ka IIT Guwahati mynta ka sngi, u Vice President u la ong ba ki Directive Principles of State Policy (DPSP) ki long kiba ‘kongsan ha ka jingpyniaid ia ka ri’ bad ba ka dei ka kamram jong ka Sorkar ban pynkylla ia kine sha ki kyndon. U la ong ba bun na ki DPSP kum ki panchayat, cooperatives & Right to Education ki dei kiba la pynkylla sha ki ain, bad u la ong ba ka la dei ka por ban pyntreikam ia ka Article 44 jong ka Riti Synshar.

U la kyntu ban don ka jinghusiar na ki jingpyrshang ban ktah ia ka burom jong ka India bad ‘ki jingwanrah ia ki khana thok na ka por sha ka por shaphang ka India,’ da kaba bynrap, “Ka por ka la dei, ba ngin ai jubab kaba biang ia kiba pynsaphariang ia ki khana pyrshah ia ka India.” “U Vice-President u la ong ruh ba ym dei ban don kano kano ka bor nabar ri ia kaba la ailad ban ktah ia ka jinglong trai bad ka burom jong ka ri. U la ong ba ka India ka dei ka synshar paidbah kaba rim, ba iar bad kaba treikam bha duh bad ba kane ka dang wanrah jingryntih ha ka jingiasuk ha kylleng ka pyrthei.

“Ngim dei ban shah ia kano kano ka jingktah ia ka Synshar Paidbah jong ngi bad ki kynhun kiba don hapoh ka Riti Synshar,” u la ong.“U la ong ba kam don kano kano ka jingmap ia ka jingbam sap mynta bad u la ong ba ka dei ban don ka imlang sahlang kaba lait na kane ka jingsniew. “Ka jingbamsap ka long pyrshah ia ka synshar paidbah, ka jingbam sap ka dei ka jingai jingshakri ka Sorkar bym biang, ka jingbam sap ka ktah ia ka roi ka par … ka imlang sahlang kaba lait na ka jingbam sap ka dei ka jingpynthikna ia ka roi ka par,” u la ong. U Dhankhar u la ong ruh ba um sngewtynnad ba katto katne ngut ki briew ki iakhih ha ka jaka ban iaid katkum ka ain, haba ki shah kem namar ka jingbamsap.“U Vice-President u la kyntu ruh ia ki samla ba kin sngew sarong ia ki jingjop jong ka India. U la ong ruh ba ki dei ban long kiba trei na ka bynta ka ioh ka kot jong ka ri bad ba ki dei ban kiar na ki rukom iohnong kiba ktah ia ka ri. U la pynkynmaw ruh ia ki ktien jong u Dr. B R Ambedkar – “Phi dei ban long nyngkong ki briew ka India, phi dei ban long khatduh ki briew ka India bad phim dei ban long ei ei lait na ki briew ka India.”“Ha ka jingai jingkren jong u ha ka jingpynkup burom, u Dhankar u la ong ia ki samla ba ki dei ba long kiba iashah ia kiwei. “ngi dei ban sngap ia ki jingsngew jong kiwei namar bun na ki por, kine ki jingsngew jong kiwei ki long kiba dei.”“Ha kane ka juh ka sngi, u VP ha ryngkat ka (Dr.) Sudesh Dhankhar ki la leit sha ka jaka mane Maa Kamakhya ha Guwahati. Hadien kane, u la don ka jingiakren bad ki samla pule jong ka IIT Guwahati.“U Lat ka jylla Assam, u Gulab Chand Kataria, u Myntri Rangbah ka Assam, u Dr. Himanta Biswa Sarma, u Chairman Board of Governors, IIT Guwahati, Dr. Rajeev Modi, Director IIT Guwahati, Prof. Parameswar K. Iyer, ki nonghikai bad ki samla pule ha ryngkat kiwei kiwei ki heh ki hain ki la iadon lang ha kane ka sngi.