KA JINGSHISHA

AIS SUJA

KA JINGSHISHA, ka dei kaei kaei kaba ymlah ban iohi ne ktah, ka long ka kynja jingngeit, bad kata ka jingngeit ka long kata ka jingsngew skhem ia kita kiei kiei kiba ngi kyrmen, ka long kata ka jingtynjuh (Test) ia kiei kiei kiba ngim iohi. Hebru 11:1

Kumjuh ruh ka Jingshisha, ka long kaei kaei ia kaba u briew u kwah bad u ba don kam ha ka jingim ba man ka sngi. U Briew u wad ia kiei kiei kiba shisha, u wad ia ka jingshisha u donkam ban pynshisha (proof). Ha ka Science kam lah ban ngeit khlem da pynshisha ne khlem ka proof. Ka science ban pynshisha, ka leh shibun ki Test ne ki Experiment, bad lada ymlah ban pynshisha, kam lah ban pdiang ia kaei kaba shu kren ne iathuhkhana. Dei nakata ka daw ka Science ka wad ia ka jingshisha, ban pynshisha, (Proof).

Haba kren shaphang ka Jingshisha, ngi kynmaw ia ka khana shaphang U Nongkhmih pyrthei bad ka Tymmen, ha kaba uwei u briew uba shang pyrthei u ladei iaid lynti napdeng ka lawbah kaba um juh tharai ba don briew ba iaid shata. Hynrei kyndit hapdeng khlaw u ia kynduh ia kawei ka Tymmen kaba shongthait harud lynti bad u kylli – Phi kaei meihep? Ka Tymmen ka jubab- “Nga ka jingshisha. Te balei phi shong thab ngab hangne? Ka Tymmen ka jubab – Namar ka shnong ka la jyrsieh da ka lamler bad ka shu thaw suda; kumta ymdon jaka ia nga ha ka”.

Kane ka Tymmen kadei ka Jingshisha, bad kam sngew juh ban iashong lang ha shnong namar ba la dap ka lamler ka jyrsieh suda. Ka jingshisha te ka wad iaka jingshisha bad kam ju shong bad ka lamler bad ki kam jyrsieh ba bun rukom. Hangne ngi sngewthuh ba bunsien ki briew ki wad ia ka jingsuk ia ka jingshisha ne ia ka hok ha kane ka Pyrthei hynrei bunsien kim shem ia ka bad ki hap ban shong puson balei kane ka jia? Ka jubab kadon tang kawei- kata na ka ktien u Blei (Bible). Ka ktien u Blei ka kren shai ba kata “ka Jingshisha kan pyllait ia phi’ U Jisu u kren shaikdar da kaba ong – Ba lada phi iaisah ha ka KTIEN JONG NGA, phi long ki synran jong nga da shisha, bad phin ioh ithuh iakata ka Jingshisha: bad kata ka Jingshisha kan pyllait noh ia phi, And You will know the Truth and the Truth will set you free. Ioanis 8:32. Hangne ha pyrthei, ymdon Jingshisha da kumwei pat ia kaba u briew un shem ia ka Jingsuk lait noh tang da kaba ngeit ha ka ktien u Blei. Ka ktien u Blei ka don ka jingshisa kaba khraw laka dei ha la marwei ha ka imlang sahlang, ha ka khaii ka pateng ne ha ka kam synshar khaddar bad ha ki kam ia said ain, ka ktien u Blei ka long ka JINGSHISHA KABA KHRAW (greatest Truth).

Na kata kadaw, donkam ia uwei pa uwei u briew ban ioh iaka bad pule iaka khnang ba ka jingim briew kan ymsah ha ka umdum. Ka ktien u Blei ka long ia baroh, ymdon pud haka, ka trei shaduh lyndet ki pud (beyond the borders). La khang ia ki jingmut jingpyrkhat u briew da ki bor soitan ki bor jingsngewniam bad bor jingstad kane ka pyrthei, u briew u don ha kaa kut lad haka lyngngoh la khang tala ia ki jingmut briew da u bymman, ka ktien u Blei ka long shabi ban plie ia ka lynti sha ka lynti ka jingshisha baroh dei nakata kadaw u Blei u ong – Ba lada phin ithuh ia ka Jingshisha, ka Jingshisha ka Ktien u Blei kan pyllait noh ia phi na ki bor ka jingdum jong ka pop bad u Soitan.

Uba pyllait ia kata ka bor Jingdum dei tang u Jisu u khun u Blei. “Namar lada u khun (Jisu) un pyllait ia phi phin long kiba la lait noh DA SHISHA. Ioanis 8:36. Amen.