Ka jingshim jait na u shynrang, kan sa kylla long “ulta phulta” ong U Bah Martle

Jatah:U President ka HSPDP East Khasi Hills u bah Martle N Mukhim, u la ther tyngeh ia kiba iasaid ban ai jait sha u shynrang, namar ba kane kan long ka jingsain dur kaba pynkylla khongpong ia ka riti dustur kaba la sain dur u longshwa manshwa.

Haba kren ha ka jingialang ialap elekshon ia u kyrtong ka Regional Democratic Alliance (RDA), u bah Robertjune Kharjahrin mynhynnin ka sngi ha Jatah, ka thain Mawkynrew, u bah Martle uba dei ruh u MDC ka Mawkynrew, u la ong ba ka jingshim jait sha u shynrang tang katno pateng la kulmar ka pyrthei bad kan wanrah ia ka jingsang ia ka jaitbynriew kumba ong ka ktien dkhar, ulta phulta.

U la ong ba u mynbarim, shwa ban ai jait sha ka kynthei, u la pynshad sha ka shaman ban pynshong nongrim bad u la shuit la shor halor kata.
Haba ther ia ka jingdawa u President ka Voice of the People Party (VPP) u bah Ardent Miller Basaiawmoit ia ka artikil 371, u bah Martle u la ong ba jingmutdur ka long kumba beh ia ka thapbalieh, katba nang beh nang her. U la ong ba ka artikil 371 ka long ka jingphoh sniew sha rngai, ban pynduh ia ka District Council.

Ha kajuh ka por, u la ong ba dei tang haba ioh ia u MP na seng riewlum ba ka jaitbynriew ka paw ha Delhi ym ha ki seng ri thor bad dei na kane ka daw ba ka UDP bad ka HSPDP ki la iatreilang.
U la kynthah ia kiba ong ba u MP ka seng riewlum un leh aiu, hynrei ki dei ban tip ba u bah Joy Nichols Roy u la wanrah ia ka District Council, u Prof. GG Swells u la iasaid ban ioh ia ka jylla Meghalaya ryngkat kiwei ki nongialam katba ki nongialam ka seng ri thor ka Congress ki pyrshah ha katei ka por.

Ka jaitbynriew Khasi ka don tang 22 lak ngut eiei, bad la wan u dkhar na Assam tang 40 lak, shaei ka jaitbynriew bad u la ong ba wat khmih lynti ba ka Congress kan ai ia ka Inner Line Permit (ILP) namar ba ki pyrkhat ia ki para rithor hynrei ia ka jaitbynriew Khasi, dei tang u Khasi na ka seng riewlum hi uban ialeh ban dawa, ym da kiwei kiba shu wan ban ialam bakla. Ban iada ia ka jaitbynriew, ban khmih lynti ba u dkhar u kling ba un iada, lada hap sa ka patlun ruh yn ym ioh.
U la ong ba ka Congress lei mynta ka kyrshan ia ka jingshongkha para shynrang para kynthei, ka bym lah shuh ban batai bad don ka kynhun kaba iakhun ban leh ia kane haduh mynta.