“Ka jingshalan masi shabar ri, kam hap ha ka sorkar jylla

Shillong, 01 Jylliew:
U nongaiktien ka AICC u Gourab Gogoi u la ong ba ka jingshalan masi shabar ri kum sha Bangladesh kam dei ka kamra jong ka sorkar jylla hynrei ka kamram jong ka sorkar pdeng.
Haba jubab halor ka jingkylli ia ka jingbym shim khia ka sorkar u Dr Mukul Sangma kumba la kynnoh da ka seng ki nongot doh Khasi Jaintia Butchers Welfare Association (KJBWA), u Gourab u la ong ba wat la ka bam ka dih ka hap ha ka jingpeit jong ka sorkar jylla hynrei ka jingshalan masi shabar ri ka dei ka kamram jong ka sorkar pdeng ban peit ia kane lyngba ki shipia ki swar jongka kiba ka la buh ban pahara ha khappud.
“Ka sorkar NDA kaba ialam da u Narendra Modi ka la leh aiu ia kane,. Mynshwa u la kop ba un beh lut ia ki nongrung beain sha India hynrei ngi kwah ban tip katno kiba rung beain sha India kiba la beh biang ka sorkar u Modi”, la ong u Gourab.
U la kubur ba ka jingshalan tuh ia ki masi ka long ka kam kaba khia bha namar ba ka ktah ia ki paidbah hynrei kam dei pat ba ka jingkynnoh kan leit sha ka sorkar jylla.
“Ka jingkhaii masi beain shabar ka long kaba sngew khia bha hynrei kam dei ban leit ka jingkynnoh sha ka sorkar jylla namar ba ka khappud ka dei ka kamram ka sorkar pdeng kaba la buh ia ki shipai BSF, bad kiwei ki tnad ban peit ia kane”, la ong u Gourab.