Ka jingshah kem U Amritpal Singh, ka dei ba u bynnud ioh ka shah kem da ka lok, kaba u dang shu dep iathoh

New Delhi: Ka jingshah kem jong U Amritpal Singh, ka dei namar ba u bynnud palat, ia la ka tnga, ba kam dei satia ban shah kem ialade bad dei na katei ka daw, ba um shym la nud satia ban phet ialade na India ruh, namar ba u shim, ba u tang shu lait phet ialade, kumta ka tnga jongu, kan sa shah kem lane shah pyndik ha ki pulit.

Ka Kirandeep Kaur, kaba dei ka nong UK, ka don mynta ha India bad ka dei kaba la shah thwet jur ha ki pulit jong ka Punjab, hadien ba U Amritpal, ula jah rngai ialade, naduh U Lber 2023. Ka Kirandeep, ka shong ka sah ha India bad ka visa jongka, ka la kut ha U Naitung 2022 bad dang shen, ka la shah khang lynti ha Amritsar, katba ka dang mut ban leit phai sha London.

Ka Kirandeep Kaur, ka wan phai sha India, ha shwa ba kan ia poi kha, kumba shitaiew bad U Amritpal Singh bad dang shen, ka la shah tohkit lem bad ka kmie jong U Amritpal, ha ka shnong Jallupur Khera.

Kumba ka long, ka jingmut jong U Amritpal, ka long, ba ka tnga jongu, ka dei ban leit phai, shwa da kaba suk sha la ka jong ka Ri. Ha kine ki shibnai tam, U Amritpal, ula phet rieh na ki pulit, ha kaba ula poi sha Ludhiana, sha Kurukhshetra, ha Haryana, Delhi, Pilibit ha Uttar Pradesh, Rudrapur ha Uttarakhand bad nangta, ula leit poi sha Hoshiyarpur jong ka Punjab bad sha Moga ha Jalandhar. U Amritpal, ula shah kem ha ka step jong ka Sngi U Blei, hadien ba ki pulit, ki la kerkut ia ka shnong Rode ha Moga District, hadien, ba ki la tip, ba U Amritpal, u don ha katei ka jaka, ha ka miet jong ka sngi thohdieng.

U Bhagwant Mann, myntri rangbah ka Punjab, u peit hi dalade, ia katei ka jingthwet ia U Amritpal, ha kaba ha ka por 4baje mynta ka step, la pyndep, ban kerkut ia ka shnong hi baroh kawei. U Mann, ula bthah ia ki pulit, ba kim dei ban rung sha kano kano ka jaka mane blei lane ka Gurudwara, landa U Amritpal Singh, u rieh ha kitei ki jaka mane blei. La iathuh ba U Amritpal Singh, u buh pisa, ha ka kyrteng jong ka tnga jongu, ha kaba ka pisa, ka don ha ki Bank ha UK. Ka Kirandeep, ka iakynduh ia U Amritpal Singh, da kaba ki ia ithuh ithaw ha Instagram bad ar snem mynshwa, ka la wan jngoh ia ka jylla Punjab, wat la ka iing jongka, ka la phet naduh u snem 1951 sha UK. Ka Kirandeep, ka la ia poikha bad U Amritpal Singh, ha ka 11tarik Rymphang 2023.

U Amritpal, u don mynta ha ka jingshah set, ha ka kyndon jong ka National Security Act (NSA), ha kaba uba shah kem, un shah set haduh shisnem, khlem shah bishar.