Ka jingshah kawang petrol bom ia ka kali pulit, kam dei ha Mawlyndep

Shillong:U Rangbah shnong jong ka shnong Mawlyndep Ribhoi District, mynta ka sngi u la wan ban pynshai halor ka jingjia shah kawang petrol bom ia ka kali pulit ha ka miet jong ka 25 tarik u Nailar 2020 bad U Rangbah Shnong, u pynshai ba katei ka jingjia kam dei ha u pud u sam jong ka shnong Mawlyndep Ribhoi District.

Ha ba ia kren bad ki lad pathai khubor, na ka liang u Rangbah shnong ka Mawlyndep u bah Jinu Kharbuki, u la iathuh ba ka ba la jingjia ha ka mied jong ka 25 tarik u Nailar 2020 kumba la paw ha ki lad pathai khubor ba ka don ka jingjia shah kawang petrol bom ia ka kali pulit, hynrei ia ka jaka pat ym don kano kano ka jingtip, hynrei u la pynshisha ba kane ka jingjia kam dei  hapoh u pud u sam jong ka shnong Mawlyndep.

U bah Kharbuki u la ong ba kane ka jingmih khubor mynta ka sngi ba ka jingshah kawang petrol bom ka dei ha Mawlyndep ka la buh ia ki khun samla jong ka shnong ha ka jingsyier.Na ka liang u rangbah shnong ka shnong Mawlyndep mynta ka sngi u la  leit ban ia kynduh ia u  Superintendent of Police jong ka East Khasi Hills, ban pynshai ba ka jingjia kam dei ha shnong Mawlyndep.

 Na ka liang u Superintendent ki pulit jong ka East Khasi Hills District mynta ka sngi u la pynshai paidbah ba ka jingshah kawang petrol bom ka kali pulit ka dei hapoh ka shnong Umbir ha Ri Bhoi District kam dei hapoh Mawlyndep.