Shillong 06 Lber: U samla Mebanjoplang Snaitang u badei u nongrwai ba lapaw bha ha kine ki sngi ba mynta, uba la rwai ia ka jingrwai khasi ka ba la ai kyrteng “Enbow”, ha kaba ki nongpeit ia kane ka jingrwai ki la poi sha 60lak ngut eiei ha ka lai bnai hapoh YouTube.
Kane ka jingrwai kadei ka jingrwai shad bad pynkhihmet khamtam ha ki jaka sngewbha,ka ba la pynkhring ia ki paidbah nongshong shnong jong ka Jylla naduh ki hep ki barit haduh ki ba la rangbah ruh.
U samla Mebanjoplang Snaitang udei u trai shnong na Nongpdeng kynbah,South West Khasi Hills District.
Ha ka jingiakren bad u Rupang mynta ka sngi palei ka 06 Tarik u Lber 2025, u samla Mebanjoplang ula iathuh,ba ia kane ka jingrwai ba la ai kyrteng “Enbow”, ula thaw ha ka ktien shnong lajong, ha kaba bun ki paidbah ki pyrkhat ba kadei ka jingrwai sniew bad khlemakor.
U la ong,ba kane ka jingrwai kam shem dei ka ba sniew ne khlemakor,hynrei kadei ka ba bha namar ula thaw ha ka ktien shnong lajong,ha kaba u la iathuh,ba ka kyntien “Enbow” ka bamut “Para”, bad ka kyntien “Jaliah” pat ka bamut “Jabieng”. Kumta u la ong,ba ki paidbah kimdei ban smgewthuh bakla ia kane ka jingrwai namar kadei ka jingrwai ha ka ktien shnong.
Haba iadei bad kane ka jingrwai u samla Mebanjoplang u la iathuh,ba ym ba u shu thaw lyngba ka jingpyrkhat jongu, hynrei kadei ka jingjia bad ka khana ba long shisha, ka ba lajia ia u paralok jongu,ka ba sa pynlong ia u ban thaw syndon da ka jingrwai.
U la ong ruh, ba kane ka jingrwai “Enbow” kadei ka jingrwai ka ba san na ki jingrwai ki ba u la dep thaw,bad kiwei kiwei Kim da iaid haduh katta katta namar u thaw ha ka ktien pdeng ka ba ia sngewthuh lang baroh,hynrei haba thaw pat ia ki jingrwai ha ka ktien shnong ka iaid bha bad shibun ki ba peit bad sngap ia ka.
Shuh shuh u la iathuh,ba ha kine ki bnai ban sa wan un sa pyllait biang ia ki jingrwai ka ba la thaw ha ka ktien shnong,bad ula kyrpat lypa ia ki paidbah ba kimdei ban sngewthuh bakla namar kadei ka jingrwai ka ba thaw ha ka ktien.
Kumta u la ai ka jingkhublei ia ki paidbah nongkyrshan ki ba la kyrshan ia u bad ula kyrpat ba kin sngewbha ban ai biang ka jingkyrshan ia u,khnang ba unlah ban nangpynmih shuh shuh ia ki jingrwai ki ba kham sngewtynnad.
Phi don ban ong eiei?