KA JINGPYRKHAT RAM-ÏA

Da u Ex.Rev.K.Langrin

Ka jingpyrkhat ramïa ka dei ka jingpyrkhat bieit, ka jingmutdur rngai bad ka jingantad khlem don nongrim. Kaba kum kata ka jingpyrkhat ka jia naduh nongkyndong haduh nongsor, naduh kiba bieit haduh kiba stad.

Ha ka por ba nga dang khynnah, nga pyrkhat ba ha ka pyrthei ki don tang 3 tylli ki shnong. Kita ki long, ka Umshynrut, Nongkrong bad ka Photjalei. Namar nga tip tang ia kita.

-Haba nga la kylla khristan, nga pyrkhat ba lada ngan leit jingiaseng lynter khlem pep kawei ruh, la thikna ban leit bneng. Nga ngeit ruh ba tang ka niam ba don ma nga ka ban ialam sha bneng. Kiwei ki niam kin leit dujok.

-Haba nga leit jingiaseng shabar shnong, nga iohi ia kiba phongsut bad deng tai. Nga pyrkhat ba kito te kin leit bneng beit.

-Ki nongkyndong ki pyrkhat ba ka jingim ha sor ka long kaba suk. Kumta ki thrang dik dik ban leit shong sha sor.

• Ki nongsor ki pyrkhat ba ki nongkyndong kim ju khuslai ne kyrduh. Ki pyrkhat ba ha nongkyndong te u khaw na sem, ka doh na sem, ka dohkha na pung, ki jhur na lyngkha. Ka pisa ruh kim ju kyrduh, namar ki die dieng sawdong, ki die dewiong, ki die rnga, ki die uranium, ki die mawshynrut, ki die masi, ki die blang, sniang,…

10 snem mynshuwa, nga la phah sah private hostel ia ki 2 ngut ki khun shynrang jong nga kiba leit pule ha St.Anthony’s bad Shillong College. Kata ka hostel ka don ha kawei ka dong jong ka Laitumkhrah. Ka trai jong kata ka hostel ka long kaba khor bad ka bym ju pyrkhat lem ia ki jingeh jong kiwei. Ka bai hostel ka long 3500/- marwei shi bnai. Kumta nga hap ban siew 7000/- shi bnai na ka bynta 2 ngut ki khun. Don ki por ba nga hap ban kyrpad ia ka trai hostel namar ba ym pat ioh pisa. Hynrei kata ka briew ka ong pynban, “Khie leit die da u dewiong , da u mawshun, da u mawshynrut, da u uranium, da ki dieng supply, da u rnga, da ki masi…”

Ah! Sa lano mo ba ki khasi jong ngi kin pynduh noh ia ka jingpyrkhat ramïa, khnang ban ym mih shuh kino kino ki jingeh bad jingkulmar?