Ka jingpynshai na ka Dorbar shnong Mynthlu halor ka khubor ba pynmih na ka seng (MPUF-EJHD) ha u Rupang

Ka jingpynshai na ka Dorbar shnong Mynthlu halor ka khubor ba pynmih na ka seng (MPUF-EJHD) ha ka 13/08/2019 ha u Rupang.

Ka jingpynshai halor ka jingsngewphylla ka seng (MPUF-EJHD) katkum ka khubor ha u Rupang ha ka 13/08/2019. Katkum ka jingbishar jong ka VDP shnong Mynthlu naduh ba ioh ia ka shithi na ka iing ka sem jong u (L) Sonarios Chyrmang ka tarik shithi 9/08/2019. Ha ka iing bishar la phah summon ia baroh ki nongleh bad nongujor ha kane ka 9/08/2019. Hynrei ha ka jingbishar u nongujor um shym lah ban wan bad ka Dorbar VDP kam shym lah ban bishar ia kane ka jingjia bad la phah summon ia u nongujor ha ka 10/08/2019 ha kane ka dorbar la kylli baroh 4 ngut ki nongshoh bad bom ia u (L) Sonarois Chyrmang ki la kubur ba ki la shoh la bom ia u ynda la kylli ia u nongujor u kpa jong u (L) Sonarois Chyrmang u Nowel Shadap balei u khlem pyntip naduh ka 4/08/2019 sha ki bor jong ka Shnong bad VDP ia kine ki jingjia baroh. Ka jubab na u Nowel Shadap ka long ba u khlem kit khia ia la u khun namar ba une u khun jong u u long u briew uba shait dih kyiad bad buaid tang lang man la ki por bad u shait thiah sngi man la ki por ha iing. Te na ka liang u kpa jong u um tip ia kane ka jingjia. Hynrei ynda la wan ki paralok jong u (L) Sonarois kiba la mut ban pynkhie ia u la lap ba um nang shuh wat tang ban kren, hangta u kpa jong u u la kyndit bad leit buh artad ia u sha Hospital ha ka 6/08/2019. Te ha ka Dorbar ba ia don lang da baroh ki nongshong shnong kiba sakhi ia kane ha khmat ki kur ki jait u (L) Sonarois, la lap ba ki nongleh ki la mynjur ban siew ia ka bai dawai bad ki jinglut jingsep baroh ha kata ka por u (L) Sonarois u dang don ha ka NEIGRIHMS Hospital u dang im hynrei katba ka jingai lad ia ki arliang mamla ba kin pyrkhat ia ki jinglut jingsep te na ka liang ka iing ka sem u (L) Sonarois ki la mih kyndit kyndit khlem da ai ka jingshai ha ka Dorbar haduh ba ka Dorbar ka la kulmar jingmut ban bishar ia ki. Te ha kaba khatduh ka Dorbar ka la ai ia ka rai na ka iing ka sem jong u (L) Sonarois, te la lap ym don jubab na ka ing ka sem jong u. Te ha ka 11/08/2019 ha ka por 10:00 AM ei ei u secretary VDP u la ioh phone na u O.C Incharge jong ka Saipung Police Station halor kane ka jingjia bad la phah SMS da u Secretary VDP sha u O.C ba yn ia phone ha ka por 6:00 PM namar ha kane ka sngi Sunday ka Balang Mynthlu ka dang don ka jingiaseng syllok sha la Balang Mulait te hadien ka 6:00 ne 7:00 PM la ioh phone na u O.C Saipung kaba u ong ba dei ban wanrah ia ki 4 ngut ki briew kiba shoh bad bom ia u (L) Sonarois ha ka step 12/08/2019 te ngi kum ka shnong ngi la ialeh ban teh lakam lut ia kine ki briew bad la bat ia ki. Ka Dorbar da kawei ka jingmut ka la rai ban leit dang step ha ka 12/08/2019 bad la ialam ia ki naduh ka por 4:00 AM 12/08/2019 sha Khliehriat.
Ka jingkyrpad na ka liang ka bor shnong ia kino kino ki seng ba kin sngewbha ban ym pynmih ia kino kino ki khubor khlem ka jingtip bniah te lada ki kwah ban pynmih khubor kin sngewbha ban leit wad jingtip shwa na ki shnong ki thaw kumjuh na ki bor ka ain. Namar ia kine ki jingjia baroh la kit khlieh da ka shnong ban pynpoi ia kine ki 4 ngut ki nongshoh bad bom ia u (L) Sonarois sha Police Station.