Ka jingpynshai, halor ka khubor kaba mih na ka liang ka Synjuk Ki Waheh Chnong Ri Jaintia, ha kaba iadei bad ka Reservation Policy

Rangbah,
Ngi naka Liang ki Waheh Chnong ka thain Iooksi Saphai, hadien ba ngi iohi iaka khubor kaba la pynmih daka Synjuk Ki Waheh Chnong Ri Jaintia habaka ki la dawa bhah laka jong hakaba iadei bad ka State Job Reservation Policy kata ka long 20% iaki Jaintia.

Hakaba iadei bad katei ka khubor, ngi kiba soi kyrteng harum, ngi kwah ban kren shai ba ngim don bynta eiei halor Kane ka jingdawa katei ka Synjuk, bad ngi kwah ban kren shai ba ngi na ka liang ki Waheh Chnong ka thain Iooksi Saphai, ngi ai ka jingkyrshan kaba pura ia u Bah Ardent M Basaiawmoit hakaba iadei bad ka jingdawa ban pynthymmai ( Review) iaka State Job Reservation Policy.

Kane kamdei shuh ka por jong ka jingia sngewpher thain, ne ka jingiapharia iaka Jaitbynriew ,hynrei ka dei ka por jong ka jingiatylli naka bynta ban iakhun iaki jingeh jong ka Jaitbynriew. Ka kyrteng Jaintia kamdei ka kyrteng ka Jaitbynriew, hynrei ka dei tang ka kyrteng ka thain, bad ngi dei ban sngewthuh ruh ba ha Jaintia la kynthup lang ia baroh kiwei pat ki Jaitbynriew kum ki Biate, ki Karbi bad kiwei kiwei bad ngim lah ruh ban kyntait dalei lei ruh iaki kum ki Nong Jaintia ba pura.

Ngi la mad iaka jingshah pharia haki por ka sorkar Phareng ha kaba kila pyndonkam iaka Divide and Rule Policy naka bynta ban pharia iaka Jaitbynriew. Hynrei ka jingthmu jong u Phareng, kam lah ban pharia iaka Jaitbynriew namar ngi don iaka jingkhein kur kaba shkem bad kaba don nongrim namar ki Phareng kim lah ban pyniakhlad iaka jingiadei kur hapdeng ki Chalam na Pnar, ki Shabong na Khynriam bad ki Mukhim na War, nangta ki Laloo na Pnar, ki Lamin na War bad ki Diengdoh na Khynriam ruh ki dang dei shikur, bun kiwei kiwei ki Kur kiba na kylleng ki thain ka Bri U Hynniewtrep kiba dang iadei shikur. Ym juh don koit ki kur na ki Jaitbynriew Biate kiba la shong la sah ha Jaintia Hills kiba dang iadei shi kur bad ki Pnar , bad kumjuh ruh , ymjuh don koit ki kur naka Jaitbynriew Karbi, kiba dang iadei shikur bad ki Bhoi wat la ki sah makna hapoh ka Ri Bhoi District. Kumta kum ka Jaitbynriew , ngim dei shuh ban pdiang iaka jingshah pharia haki Nongwei nongar kiba thmu ban pyniapher hapdeng jong ngi kum ka Jaitbynriew.
Khatduh khatwai ki Waheh Chnong ka thain Iooksi Saphai, ki la kitbok kitrwiang ruh ia u Bah Ardent Miller Basaiawmoit ba un nang ioh iaka met kaba shait ba khlaiñ bad kumjuh ruh iabaroh ki paidbah ka Bri U Hynniewtrep hi, kyrmen ba Kane ka jingdawa jong ka Jaitbynriew kan sa urlong khlempep shisien ka sngi daka jingdon ryngkat U Blei iangi kum ka Jaitbynriew.

Khublei Shibun,

1. Mr Nangaibormi Sutnga Waheh Chnong Umdeinlin Iooksi.
2. Mr Leonard Rabon Waheh Chnong Iooksi Kyanmynsar.
3. Mr Gino Synnah Waheh Chnong Saphai
4. Mr Clement Pala Waheh Chnong Iawthymmei
5. Mr Watsing Papeng Waheh Chnong Nongryngkoh
6. Mr Chesnal Manar Waheh Chnong Pohkseh
7. Mr. Siworning Sayoo Waheh Chnong Madanrwai
8. Mr Histokrist Pachiang Waheh Chnong Iooksi Iapkhla
9. Mr Kyrshan Chullet Waheh Chnong Priang Iooksi.
10. Mr Deilang Wahlang Waheh Chnong Sarhen
11. Mr Hamran Lyngdoh Waheh Chnong Iooksi Tongkiad