KA JINGPYNSHAI HALOR KA JINGSUBA BA DEI KI RUNAR BA NA NONGJNGI BA LA PYNIAP IA U WEI U RANGBAH HA TAKHNIANG

Ngi na liang ki waheh Shnong kiba don hapoh ka Raij Nongjngi hadien ba ngi iohi ia ka jingmih ka khubor ha Rupang haka 31-03-2021 haba iadei bad ka jingshahpyniap jong u wei U rangbah ba kyrteng U Moris lamin haka Shnong Takhniang, ka pynsngew phylla bad pynlyngngoh ia ngi kum ki nong ialam Shnong namar katkum ki khubor bala mih une u rangbah ba shah pyniap u dei na ka shnong Nongjngi khliehriat ha ka jing shisha u dei na ka shnong Moriap, Elaka Mynso bad ba shong kha ha khliehriat bad ha ba mih ka khubor ki dei ban shai bha namar lada kim shai ka pynkulmar bad ka pynthoh bria ia ki nong shong shnong ka jong ngi bad haba iadei bad ka jingsuba ba ki runar ba pyniap ia uta U Rangbah ki dei na Nongjngi, ngi kum ki nong ialam jong ki shnong ngim shai ha kano ka shnong ba don kita ki runar, namar haka Raij Nongjngi ngi don la ki jong ki jong ki Dorbar Shnong.

Te kumta ngi kyrpad ia ki nongthoh bad nongai khubor kim dei ban pynthoh bria ia ki shnong ka jong ngi haba thoh bad ai khubor dei ban shai bha ki khubor khnang ban ia shai. Kum ka jingpynshai hangne ka Nongjngi ka dei ka Elaka bad ka Raij Nongjngi bad ka Headquarter jong ka Elaka Nongjngi. Hapoh ka Raij Nongjngi ngi don la ka jong ka jong ka Dorbar Shnong bad kita ki dei: 1. Lumlyngdoh Nongjngi 2. Khliehshnong Nongjngi 3. Moolephaw 4. Iongthma 5. Iangkar 6. Lumtrep, bad 7. Ionglwit. Hapoh ka Raij Nongjngi ngim don kum kata ka Dorbar Shnong Nongjngi katkum ka khubor bala mih ha Rupang namar ngi don la ki jong ki jong ki Dorbar Shnong.

Pynkut Ka kyrwoh na ki waheh shnong ka Raij Nongjngi.