Ka jingpynmih hukum ka DC, kaba bakla, ong U Bah Paul

Shillong:Ka jingmana ka Deputy Commissioner ka East Khasi Hills ban khang dukan hapoh 10 baje janmiet ha baroh kawei ka sor Shillong, kam long kaba bha namar ba kan ktah ia ka kam jngohkai, ia ki kam khaïi pateng jong ki briew.

Haba pynpaw ba kane ka hukum ka DC, kam long kaba dei, u myntri ka tnad jngohkai ka jylla u bah Paul Lyngdoh u la ong ba ki paidbah kin kham shngain shibun ban iaid ban ieng haba plie ki dukan ban ia kaba khang ia ki dukan.
“Kaba nyngkong ka long ban pynshlur ia ka shongsuk shongshngain, ki briew ki kham sngew shngain ban iaid ban ieng haba plie ki dukan, kumno ki briew kin sngew shngain ban iaid haba dum haba dum haba ym don briew lada la khang ia ki dukan”, la ong u bah Paul.

U la ong ba ki jingjia ki don beit hangto hangto wat sha ki ri ba la shai ruh, hynrei kam mut ban khang noh ia ki dukan pat.
Lah ban kdew ba ka DC ka la pynmih hukum ba baroh ki dukan kiba don ha Shillong ki dei ban khang noh hapoh ka 10 baje janmiet khnang ban tehlakam ia ki kam runar ruser ha ka nongbah.
“Ki briew kiba poi 10 ne 11 baje mynmiet ha hotel kin ioh bam naei. Ki don ki briew kiba trei miet, kiba trei ha hospital, kiba donkam kyrkieh bad kawei pat”, la ong u bah Paul.

U la iathuh ba u la dep iakren ia u Myntri Rangbah bad ia u symbud myntri rangbah uba la kular ban khot ia ka jingialang lashai ka sngi ban bishar ia ka jinglong jingman.

“Ha nga, ka jingpynmih hukum ka DC ka long kaba bakla. Ki jingjia ki jia wat ha ki ri ba la shai ruh hynrei kam mut ban khang noh ia ki dukan”, la ong u myntri bad u la bynrap, “kiba bun ki briew ki leit sha Guwahati namar ba ki sngew tynnad ba ioh iaid kai sngew tynnad”.