Editor,
Nga la kyndit bad sngewsih kthang ban tip na ki lad pathai khubor ba ka la don ka jingthombor naphang ia ki 8 ngut ki nongtei ia ka Hostel ki samla pule kynthei ha ka Jesuit Centre for learning ha Umoid Jan Pynden Diwah, kumba 12 km na Jakrem, S.W.K.Hills.
Kane ka jingthom jong kumba 15 ngut ki runar da ki tiar ki ba ma, uwei u la khlad noh bad 7 ngut ki la mynsaw jur. Hadien ba ki la ioh jingsumar ha Civil Hospital, Shillong, ki la leitphai noh sha jaka lajong ha Mankachar, Lower Assam bad la tep noh ia u ba la khlad.
Ki pulit na Mawkyrwat ki la kem ia ki katto katne ba la suba ba ki donkti ha kam thombor. Kan long ka ban suk ia ki pulit ban ioh kem lut ia kiba donlang ha Kane ka kam runar, kynthup ia ki ba la phah bad ba la plan ia Kane ka kam. Shuh shuh, ki ba kum kine ki jingjia, ban thombor ia ki nongbylla dkhar, ki la ju jia ha kylleng ka Ri jong ngi. Ki dak ki shin ruh ki long kajuh bad ki ba plan ia Kine ki jait kam run ki long kajuh. Wat ki ba bun ki riew paidbah ruh ki la sngewthuh mano ba la ju leh ia kine ki bait kam.
Ka jingkylli ka long hato kine ki jait kam ki long kiba bha bad ki ba shong ain, khlem pep ki long kiba sniew, ka pop bad ki ba be-ain. Hato ngi kum ka jaitbynriew, ngi iashah bad hikai ia ki Khun samla lajong ban leh ia kum kine ki jait kam? Ngim lah satia. Ngim lah ban shim ia ka ain ha ka kti lajong. Lada ngi ieng skhem ban ieid, kyntiew bad iada ia ka jaid bynriew ngim lah ban shu leh thurmur, leh riewkhlaw, leh jubor, thombor, donbor, leh sang, leh be-ain bad iuhroit ia kiwei. Hynrei ngi dei ban pyndonkam da ka jingstad, leh sian, antad, phikir, da ka jingjai jai bad da ka lynti ba shong-ain. Sa kawei ka lynti ban pyndonkam ka long da ka jingiakren sngewthuh jingmut (discussion and dialogue). Nangta, kum ki riewshai, ngi dei ban pyndonkam ia ka akor ka burom.
Katei ka jingjia ka lah ban mih na ka sni jong ka jingisih dkhar (communal passions), ka jingbym shai jingmut lane ka jingbym iapei phang hapdeng ki bor pyniaid jong ki Jesuits bad ki katto katne ki mamla bad ka lah ban mih na ka daw jong ka peisa. Kiwei kiwei ki daw ki lah ban mih na ka jingbishni niam lane kynhun balang lane bishni ki nongkwah bylla bad kontraktor ba ki kwah hir hir ban pyntrei ia ka mega project tei College ki Jesuit ha Umoid. Ngam tharai ba don politics ei ei ha Kane ka jingjia.
Ha ka jingshisha, nga la kmen shibun ban ioh jingtip, ba ka Seng riewniam Jesuit ba pawnam tam ha pyrthei bad kaba la paw ruh ha ka nam ba bha ha pyrthei ha ka jingsynniang ban seng ia ki skul, ki kolej, University bad kiwei kiwei ki kyrdan pule kiba pyntbit ia ki samla pule ha ki Ri bapher jong ka pyrthei, ka la wan ban seng shuwa ia ka Kolej ha ka thain Maram da kaba wanshong shnong bad tei ia ka kolej ha ka jaka kaba heh bad ba iar bha ha shnong UMOID, kumba 4 km na Umshit jong ka thain Jakrem.
Lyngba kane ka jaka shong jong ka jingstad ha Umoid, Maharam Syiem, W.K.H.District. Kane thain Maram baroh kawei kan sa tyngshain bha bad kan bthat noh ia u kynjri jong ka jingsahdien. Ki samla pule na bun ki shnong ki ban ioh jingmyntoi na ka St. Xavier’s Co-Education College kin dei ka Pynhar, Shadmoit, Umoid Shait Shait, Sohphoh, Pynden Diwah, Laitnongrim, Mawpon, Lawblei, Umjarain, Mawmahwar, Mawmietbah, Pongkung, Jakrem, Rangmaw, Phlangkynshi, Phodlamwe, Mawkohphet, Mawten, Nonglang, Phodjaut, Rangthong, PyndenSpar, ka Mawkyrwat, ka Mawlangwir, ka Mawranglang, ka Tiehnongbah, ka Rngikseh, ka Lawbyrtun, Mawkyllei, Nongdom, Nonglait, Dommawlein, Pariong, Laitnamlang, Domphetkhniang, Rngisawlia, Sngimawlein, Mawthong, Jan Baron ki shnong Shiliang Wah Rilang bad kiwei kiwei kiwei ki shnong kiba hab ha hima Nobosohphoh, Mawiang, Langrin bad ki shnong ba hap hapoh hima Maharam.
U bah Philip Marwein,
Shillong.
Ka dei ka jingleh riewkhlaw ka bym lah ban pdiang da ka imlang ka sahlang jong ki Maram lano lano ruh.Kyrmen ba kum kane ka jingjia kan ym jia shuh hadien habud.