Ka Jingpule mynta ka dei ban thaw kam, ym dei shuh ban wad kam

Babu Kular Khongjirem

Ka juk ka la kylla pyrdet bak-ly-bak mynta na kato ka juk ha ki por mynshwa.Mynshwa,shisien ba la leit pule,kata,la tikna beit ba ka kam ka la ap lypa.Saw phew ne san phew snem lei mynshwa,shisien ba la pyndep ia ka klass vi shaneng,kata,wat na iing ruh ki la wan khot hi.Ym donkam interbiw thoh(written interview) ne interbiw markhmat(personal interview) hynrei shisien ba la ia kohnguh,ka kam lah ioh lypa ha kti bad ka tulop ruh khlem jingpynthut ne jingleh kyllain ei ei.Yn nai iakren ia kito lei kiba la pass matrik ne klass x(ten) ba ki la wan khroh wan kjor da ka kam sahep ba heh bha naduh na ing na sem.Mynshwa ka dei shisha ka jingpule ban ioh kam bad ka long shisha kumta.

Phai pat sha kane ka juk mynta.Ha ki kyrdan MA/MSc/MCom,etc.lah jlep ka wad kam.Wat lada pass da ki kyrdan Engineer ha ka lain bapher bapher ruh lap ba dier sa ka rta ioh kam bad ka thait ka shong iing bad lut ei tang ka por,ka bor bad pisa tang haba leit wad ban thep kam.Lada pass tang ia ka klass x(SSLC) ne klass xii(HSSLC) lei lei ki dang khein kyrdan khynnah.Wat lada pass ia ka degree level kum ka BA/BSc/B.Com,etc, ym pat long ban ia kren ia ka kam lada phim don ki nongkyrshan kiba skhem nadien (back up).Lada leh da ka buit tuh ban thied kam ruh,bun ki kam kamai thok kamai shukor suda.Bun kiba la liat ha kum kine ki thliew khamtam ki kam company bapher bapher kiba la kylla dujok pynban ha ka jingim briew jongngi ha kane ka pyrthei.Bun kiba shah teh bad kylla mraw ei mynta ba shah shet ha ka wad kam lamwir mynta. Kane ka juk mynta ka la ih bha ba lah dei ban hikai bad lam lynti noh ia ki khynnah pule sha ka thaw kam thaw jam ym dei shuh ka jingpule ban ioh kam ioh jam.

Ha kiwei kiwei ki ri kiba la shai bad riew spah,dei ki samla pule kiba thaw kam bad ka sa roi bad riew spah ka ri jongki.Ha ka state Panjab bad Haryana,kiba rep hangto dei kiba la pyndep ia ka jingpule ha ka rep ka riang(agriculture). Ha state Meghalaya jongngi pat,shisien ba la shong skul ha ka kyrdan klass ix/x,kata,la sngewlehrain bad sngewpoh ban bat wait ne mohkhiew ne ban kit khoh.Lada ym lah ban wanrah biang ne saindur ia ki khynnah pule ba kin kheinkor bad niewkor biang ia ka thaw kam bad iai ap sah ha ki kam suk(kam sorkar) ka pateng ban wan kan long kaba dum tliw tliw bad i sheptieng pynban ba kane ka kam suk kan pynkylla nongtuh,nonglute bad nongpynjot thiaw ia ka imlang sahlang, ka jingteh mraw ia ka ri bad ka jaitbynriew ba ieit jongngi ha ki pateng kiban wan.