Ka jingpluh ki khlaw ki btap ka dei ka kam iap kam im

Staising Kharbteng

Ki dieng ki siej ne ki khlaw ki btap kiba jyrngam ki long ki nongmuna ba khraw haduh katta katta ia baroh ki jingthaw kiba don jingim namar ki ai ia ka lyer kaba khuid ne oxygen ban ring mynsiem bad ban tan pat ia ka lyer jaboh ne carbon dioxide ban pynkhuid ia ka mei mariang, ka jingioh ia u slap ba janai bad long ki tlong um ban sam um bam um dih bad sha ki lyngkha rep, ka jingpyntngen ia ka mariang nalor shibun kiwei kiwei ki jingmyntoi kiba bun.

Hapdeng kitei ki jingdonkam ba kongsan jong ki dieng ki siej, sngewsih ban iohi ia ka jingpynjot pathar ia ki bad ia ki khlaw ki btap da ka jingthang dusmon ia ki ha kine ki aiom rang tyrkhong da ki briew ki bym don jingkitkhlieh satia ia ka lawei u khun bynriew. Ngi sakhi ia ka jingpluh ki khlaw ki btap ki lum ki wah ha kine ki sngi ha kylleng sawdong ka Bri u Hynniewtrep jong ngi kaba i pangnud haduh katta katta kaba pynsniew dur ia ka mariang.

Ka jingdon ki katto katne ki briew kiba lyngkot jingmut jingpyrkhat ban thang dusmon ia ki lum ki wah ka pyndiaw mynsiem ia kito kiba ju shimkhia ban pynneh pynsah ia ka mariang kiba ai jinghikai ia ki paidbah nongshong shnong kylleng sawdong ban thung dieng bad pynneh pynsah ia ka jingjyrngam ka mei mariang.

Kum uwei na ki ‘riew ieit mariang sngew ban ong ba ka long kaba donkam ba ki bor shnong, bor hima bad bor sorkar kin shimkhia ban ai jinghikai ia ki paidbah nongshong shnong ba ki dei ban don ka jingsngewthuh bad jingkut jingmut ban iada ia ki khlaw ki btap bad ban long phikir ha ka jingthang bun ( jhum cultivation ) ia ki lyngkha rep ba ki pynkhreh ban rep ban lait na ka jingpluh ki lum ki wah ne ki khlaw.

Ha ka juh ka por ban thwet jur ia ki nongthang dusmon kiba pynpluh ia ki khlaw ki btap ne ki lum ki wah bad pynshitom ia ki katkum ki kyndon pynjot mariang khnang ba yn lah ban teh lakam ia katei ka jinglong kaba bakla bad ba sniew bad ruh ban long kum ka jingai jingsneng ia ki ‘riew tamti tamjat na bynta ka jingmyntoi lang baroh jong u khun bynriew bad baroh ki jingthaw kiba don jingim ha kane ka pateng kaba mynta bad ka pateng ban wan ruh.