“Ka jingphaidien Bakhraw!”

AIS Suja

Kan don ka jingphaidien kaba khraw, ong ka ktien u Blei, hadien ba la kut ka por jingaiei, u Blei u la buh ka por jingryngkang ia ki Israel 1875 snem (70 AD – 1945 AD). Hapoh kine ki 1875 ki snem bad haduh mynta, u Blei u la ai ka lad ka jingpyniasuk ia ki Jentil, kane ka lad jingpyniasuk bad u Blei ka dang iaid satang katto katne snem.

Namar ba ka la kut noh ka por jingryngkang ki Israel ka por jing pynsaphred ia ki sha kylleng ka pyrthei. U Blei u la lum pat ia ki Israel naduh u 1978 AD da ka jingpynbna da ka UNO ba ki Israel ki la ioh ia la ka jong ka Ri. Kumta ki Israel ki la don ha la ka Ri 72 snem mynta. La pyndep ia ka ktien ba u Blei u la kren – “Ha khmih ki sngi ki wan ong u Trai ba Ngan pynphai pat ia ka jinglong mraw u paidlang jong nga, ki Israel bad ki Judah: Ngan pynphai pat ia ki SHA KA RI KABA NGA LA AI HA KI KPA JONG KI, BAD KIN IOH IA KA” Jeremaiah 30:3.

U Blei u la dep pynphai pat, bad ki la ioh ia la ka Ri ha u snem 1948 AD, bad ka la dap 72 snem mynta. U Blei u la pynphai pat ia ki Israel sha la ka jong ka Ri na ka bynta ban pynkhreh thma, u ong “Pha long u Sdie iapom jong nga, ki tiar ialeh thma jong nga” Pule Jeremaiah 51:20-23.

Kaei kaba ngi iohi hangne ka long ba hapoh ka por ka jingryngkang jong ki Israel, ka don pat ka jingpyniasuk u Blei bad ki Jentil. Ha ka shithi u Paul sha ki Nong Rom – “Hynrei pleng da kata ka jingryngkang jong ki Israel, kata, ka jingpynim ka la jia ha ki Jentil” (baroh ki hima pythei ki dei ki Jentil, ma ngi ruh). “Ka jingryngkang ki Israel, ka long ka jingmanbha ia ka pyrthei.

Kata ka jingduh jong ki Israel, ka long ka jingmanbha ia ki Jentil” Nong Rom 11:11-12. Kaei ka daw? Ka daw ka jingkyntait noh ki Israel (Jiw) ia u Jisu Khrist, hynrei ki Jentil ki pdiang ia u Jisu Khrist hapoh kine ki por 2000 snem tam mynta. Kumta kata ka por jingpyniasuk hapdeng u Blei bad ki Jentil ka la jan ban kut noh mynta. “Tad ynda kata ka jingdap jong ki Jentil kan da ioh wan hapoh” Nong Rom 11:25. (ka mut tad ynda kut ka ia ki Jentil), u Blei u ong ia ki Jentil – “Ma phi ruh (Jentil) mynno mynno phi la ju long ki bymkohnguh ia u Blei, hynrei mynta phi la ioh jingisynei da kata ka jingbymkohnguh jong ki Israel ……. da kata ka jingleh isynei sha phi (sha ki Jentil) yn leh isynei kein ia ki Israel ruh” Nong Rom 11:31.

Ka mut tang shu la kut ka ia jingpyniasuk hapdeng u Blei bad ki Jentil, u Blei un sdang pat ia ka jingpyniasuk bad ki Israel. U Blei u la kren u ong – “Kane ka long ka jutang jong nga ha ki Israel, ynda ngan kit noh ia ki pop jong ki” Nong Rom 11:27. Ka dak mynta ka la paw, ba ka ia ki Jentil kan kut noh. Yn sdang pat ka ia ki Jiw ne Israel.

Tang shu kut ka ia jingpyniasuk u Blei bad ki Jentil (hima pyrthei), kan wan ka jingphaidien bakhraw baroh kiba ngeit, kan long ka por ba shyrkhei. Ka ktien u Blei ka ong – “Naba kata, kan ym wan lymda jia shwa ka jingphaidien” 2 Thessoloni 2:3. Kaei kata? Bun kin hap noh na ka jingngeit, kin phaidien, ha shwa ba yn pynpaw ia u briew ka pop, uta kein uban sa shong ha ka Temple ha Jerusalem bad un leh blei ialade. 2 Thessoloni 2:3-4. Uta u dei u ksuid bad u soitan uba ka kyrteng jong u mynshwa dei u Lucifer.

Kin long ki por kiba shitom, “Kane ka pateng bynriew kan ym leit noh, khlem da pyndep ia kine kiei kiei baroh” Mathaios 24:34.
Kan sa long, ka jingphaidien bakhraw!.