KA JINGPANG THYROID

Kong L Kongwang

Ki dak jongka jingpang thyroid bad ki jingbam kiba lah ban iarap naka bynta ka jingtreikam bha jongu thyroid.

U thyroid udei u glands uba iasyriem haka dur jongka thapbalieh uba don ha khmat jong u ryndang bad u don ka jingkitkhlieh naka bynta ban pynmih iaki thyroid hormones. Kine ki hormones ki iarap ha kaba pynbiang iaka temperature jongka met, ka metabolism bad ka jingkhih ne jingtied jongki thiedsnam (pulse). Lada ka jingtreikam jong u ka shah pynthut ha kino kino ki rukom kalah ban pynlong lynga iaphi, bad kalah ruh ban wanrah ka jingktah kaba jur ha u liver, ki snier, ki khyllai bad ka wanrah ruh iaka jingkiew ne jinghiar jongka jingkhia kaba shong haki jait jingshitom thyroid kiba ktah iaphi.
Kino kino ki jingthut ha kaba iadei bad thyroid kalah ban wanrah iaka jingpang kum ka hypothyroidism, hyperthyroidism bad kiwei kiwei pat ki jingpang kiba iadei bad u thyroid.
Hangne kidon katto katne ki dak jingshitom kiba hakhmat eh jongka jingpang thyroid kiba phi dei ban tip. Bad kidon ruh katto katne ki jingbam kiba phi lah ban kynthup naka bynta ban kyntiew iaka jingtreikam bha jong u thyroid.

KI DAK JINGSHITOM JONGKA JINGPANG THYROID

1. KA JINGKIEW NE JINGHIAR KYNSAN KA JINGKHIA:— Ka jingkylla kynsan kynsan haka jingkiew ne jinghiar jongka jingkhia kadei kawei naki dak ba paw bha jongka jingpang thyroid. Ka jingkiew kynsan ka jingkhia kalah ban kdew halor ka jingduna jongki thyroid hormones kaba la ju khot ne tip kum ka hypothyroidism.
   Bad lada u thyroid u pynmih kham bun ki hormones palat ban iaka jingdonkam ka met, ka jingkhia ka met kalah ban hiar palat ban ia kaba phi mutdur iakaba latip ruh kum ka hyperthyroidism.
2. KA JINGKYLLA HAKA RUKOM TIED JONGU KLONGSNAM:— U thyroid hormones u ktah jan manla kawei pa kawei ka dkhotmet haka met bad u don ka bor kaba lah ban pynkylla kloi kloi iaka rukom tied jongu klongsnam. Kito ki briew kiba don iaka hypothyroidism ki lap bad sngewthuh ba u klongsnam jongki u tied kham suki ban iakaba ju long. Kito pat ki briew kiba don iaka hyperthyroidism ki lap bad sngewthuh iaka jingtied sted u klongsnam bad kane kalah ban pynkiew iaka blood pressure ne kiwei kiwei pat ki jingshitom kiba iadei bad u klongsnam.
3. KA JINGTHUT THIAH BAD KA JINGTHAIT KLOI KA MET:— Ka jingthut thiah bad ka jingsngewthait kloi ka met la jutip baka don jingiadei bad ka jingpang thyroid. Ka jingthait kalah ban nangpynsniew shuh shuh khlem ka jingiohthiah bha mynmiet. Ka hypothyroidism ne ka underactive thyroid kalah ban wanrah iaka jingsngewthait bad tlot kloi ka bor katba ka hyperthyroidism kalah ban wanrah iaka jingkhong khong bad dukhi mynsiem naka jingbymiohthiah bha.
4. KA JINGAT HA U RYNDANG:— Ka jingat ne jingheh ha u ryndang kadei ka dak paw kaba lah ban iohi ba don ka jingthut ei ei ha u thyroid. Teng teng kane ka jingat kalah ban pynkylla shaka jingpang thyroid cancer. Kumta phi dei ban wad iaki lad jingsumar naka bynta ban sumar kloi ia kum kine ki jait jingshitom.

KATTO KATNE KI JINGBAM KIBA PHI LAH BAN KYNTHUP HAKI JINGBAM BAN KYNTIEW IAKA JINGTREIKAM BHA JONG U THYROID

KI SLA JHUR JYRNGAM:— Ki sla jhur jyrngam kidei ki tynrai halor ka jingdon ki antioxidants, la magnesium bad ki minerals kiba lah ban aibor iaka met bad ki kyrshan iaka koit ka khiah jong u thyroid.

KI JINGBAM DURIAW:— ki jingbam kiba ioh na duriaw kum ki dohkha Seaweeds, ki Tuna, ki Salmon, ki shymprong bad ki Sardine kidei kiba bun ka iodine. Ki thyroid glands ki donkam iaka iodine ban pynmih iaki thyroid hormones bad da kaba bam ia kine ki jingbam duriaw kalah ban iarap pynbiang halor ka jingtreikam jong u thyroid. Hynrei dei ban bam antad kat ban biang ban lait na kino kino ki jingeh.

KI SOH EHSNEP:— Kine ki jait soh bunsien ki ju ai shibun ki jingmyntoi naka bynta ka jingkoit jingkhiah ka met ha baroh ki liang. Ki soh ehsnep kum u cashew, ki soh khyllam bad ki symbai pathaw kidei kiba bha naka bynta ki thyroid. Hynrei dei ban bam antad ne bam katban biang lada phi dei kiba don lypa iakane ka jingshitom.

KA VITAMIN D:— Ka Vitamin D kadei ka jait fat soluble vitamin bad kadei kaba donkam bha naka bynta ka koit ka khiah jongka met. Ki jingpule ki pyni ba ka jingbun ka Vitamin D haka met kalah ban iarap kyntiew iaka jingtreikam jongu thyroid. Ki jingbam symboh Oatmeal, ka soy milk, u soh ne ka umsoh niamtra kidei ki katto katne na ki jingbam kiba bun ka Vitamin D. Ka jingkynthup iaki jingbam ba bun ka Vitamin D ka iarap ruh naka bynta ki shyieng, ki dohksah bad ki bniat.

BROCCOLI:— U broccoli, ki Brussels sprouts bad u Phul kidei ki jait jhur cruciferous kidei kiba iarap ban kyntiew iaka jingtreikam jongu thyroid kiba phi dei ban kynthup haki jingbam jongphi. Kine ki jait jhur ki iarap ban pynduna iaka jinglong tyrha hapoh ka met bad ki iarap pyllait naki jingpang kiba nehslem haka met. Kine ki jait jhur ki iarap khamtam is kito ki briew kiba don iaka hypothyroidism.

KA PYLLENG:— Ka pylleng kadei kawei na ki jait jingbam kaba tyrwa shibun ki jingmyntoi ha kaba iadei bad ka koit ka khiah ha baroh ki liang. Ka jingdon ka selenium haka khangai pylleng kaba long ka thymmei halor ka jingdon ki minerals kiba lah ban iarap pynkylla ne pynduna iaka jingpang thyroid T4 sha ka T3. Ka pylleng ka lah ban iarap kyrshan naka bynta ka jingdonkam ha u thyroid.

KHUBLEI