KA JINGPANG KLONGSNAM

Kong Linda Kongwang

Ki jingbam baphi donkam ban bam bad kiar na ka bynta ka jingkoit jingkhiah jong u klongsnam.

Katba ka rta ka nangiaid, shibun kiei kiei ki jingkylla ki wan haka jingim jongphi. Kidon ki jingkylla kiba wanrah kiei kiei kiba bha bad ki don ruh katto katne kiei kiei ki ba wallam ka jingbymsngew tynnad haba ka rta ka nangheh khamtam ha kaba iadei bad ka jingkoit jingkhiah jongka met.
Bun nangi, ngi lah ban iohi ba kito ki briew kiba la kham heh ka rta, ki ju mad katto katne ki jingshitom haka met bad ka jingpang klongsnam kadei kawei naki jait jingshitom kaba kynrei bha kaba ki broew ki ju shahktah bha katba ka rta ka nangheh. Kumba ngi tip, u klongsnam udei uwei naki dkhotmet ba donkam tam jongu briew bad lada um lah ban treikam bha, u briew ulah ban mad iaki jingshitom kiba shyrkhei bad wat ka jingiap ruh.
Ka jingpang klongsnam ka kynthup iaka jingpang ba ktah ia u thiedbah jongu klongsnam, ka jingbymbiang ka jingtied jongu klongsnam, ka jingpang shadem, ka jingpei thliew ha u klongsnam, ka jingtlot u klongsnam bad kiwei kiwei de.

Haba u klongsnam u sangeh ban treikam lane ban kynshait snam ha ki katto katne sekhon, u briew u lah ban khlad hangto hangto hi. Ka jingshitom ha u klongsnam kalah ban dei naka daw ka jingbymbiang shapoh ka met lane naka daw ki rukom im ki bymbha kum ka jingmlien ban bam ki jingbam bymtei, ka jingduna ka jingkilan met, ki jingbankhia bad ka jingkyrni haki jingmlien ba sniew. Ki jingbam ba tei met ki shim iaka bynta kaba kongsan halor ka jingkoit jingkhiah jong u klongsnam bad harum ki katto katne ki jingai jingmut kiba phi donkam ban bam bad kiar na ka bynta ka jingkoit jingkhiah jong u klongsnam.

KI KATTO KATNE KI JINGBAM KIBA PHI DONKAM BAN KIAR.

1. KA DOH:— Ka jingbam palat ia kino kino ki jait doh kalah ban kyntiew ka jingma halor ka jingpang klongsnam bad diabetes. Kane kalah ban dei naka daw ka jingdon ka saturated fat kaba kyntiew halor ka jingdon ka cholesterol kaba sniew haka met.
2. KA SODA:— Kino kino ki jingdih pyngngad kiba khlehlang bad ka soda kidei kidei kiba dap daka jingdon ka shini. Kine ki jingdih kiba ymdon satia kino kino ki jait nutrients bad vitamins bad ka jingdih ia kine ki jait jingdih ka kyntiew ka jingkhia ka met bad buh jingma halor ka jingioh iaka jingpang klongsnam.
3. KA JINGDIH KYIAD:— Ka jingdih kyiad shaba palat ka lah ban ktah ia baroh ki bynta jongka dkhotmet bad ruh ka buh jingma halor ka jingkiew ka high blood pressure kaba ialam shaka jingthut treikam jongu klongsnam.
4. KI JINGBAM BALA KHREH LYPA:— Khambun ki jingbam bala khreh lypa kidei kiba jur ban don ka fats bad ka sodium haki. Kine ki jait jingbam ki buh jingma naka bynta kito kiba la shahktah lypa naka jingpang klongsnam bad ka bha ban kiar katba lah ban lait naka jingshahktah jongu klongsnam jongphi.
5. KI JINGDIH BATHIANG:— Khambun ki jingdih bathiang la ju pyndonkam ban khlehlang shibun ka shini haka bynta ban wallam ka jingbang haki, hynrei kine ki jingdih kiba jur palat ka shini ki long kiba sniew naka bynta ka jingkoit jingkhiah jongka met. Kane ka buh jingma halor ka jingkiew ka jingkhia bad ka daw halor ka jingshahktah haka jingpang klongsnam.

KI KATTO KATNE KI JINGBAM BA PHI DONKAM BAN BAM.

1. KI JINGBAM SYMBOH:— Kine ki jingbam kidei kiba riewspah halor ka jingdon ka antioxidants, ki protein, ki fibre haki bad ruh kidei ki thymmei jongka Folate kiba lah ban ai jingmyntoi shibun halor ka koit ka khiah jongu klongsnam.
2. KA UM SOHJEW:— U sohjew u don kyrhai ka Vitamin C bad ka antioxidants ha u kiba lah ban pynkhuid iaka jingdon ki jakhlia hapoh ka met. Ka um jong une u soh kadei ruh kaba lah ban wallam ka jinglong jem bad long kylluid jongki thiedsnam, kaba ialam pat halor ka jinghiar ka blood pressure. Kalong kaba bha ban dih iaka um sohjew manla ka step naka bynta ban kyntiew iaka jingkoit jingkhiah jongu klongsnam. Shiklat ka um sohjew ka iarap ban pynhiar iaka blood pressure ka balah ban ai jingmyntoi na ka bynta u klongsnam.
3. KI SOH EHSNEP:— Kine ki soh kidei kiba dap daka jingdon ki nutrients bad ki micro nutrients haki. Ka jingbam shikham iaki soh ehsnep kalah ban ai jingmyntoi shibun halor ka koit ka khiah jongu klongsnam. Katto katne ki soh ehsnep ki kynthup u soh khyllam, shana budam, soh ot, ki nei bad kiwei de kidei kiba kynsai napdeng kine ki jait soh kiba ai jingmyntoi naka bynta u klongsnam. Kine ki soh ki jur ban don ka unsaturated fats kiba kynsai kiba lah ban pynduna ka jinglong tyrha bad long khim haki thiedsnam kiba ai jingmyntoi halor ka jingkoit jingkhiah jong u klongsnam.
4. KI DOHKHA:— Ban bam iaki dohkha la kumno kumno arsien shitaiew kalah ban iarap ha kaba pyniar iaki thiedsnam namar ki dohkha ki don ka Vitamin E haki bad kidei kiba dap daka jingdon ka omega fatty acids kiba kynsai kiba lah ban ai jingmyntoi naka bynta ka jingkoit jingkhiah jong u klongsnam. Ka jingdon ka Vitamin E ha ki dohkha ka lah ban iada na ka jinglang ka snam bad iada naka jingkiew ka blood pressure.
5. KI DARK CHOCOLATE:— Kine ki jait jingbam laju tip ba ki don kyrhai ka antioxidants kaba lah ban ai jingiada naka jinglang ka snam ha u klongsnam bad jabieng. Bam ia u dark chocolate la kumno kumno arsien shitaiew naka bynta ki jingmyntoi ha baroh ki liang bad ruh na ka bynta ka koit ka khiah jong u klongsnam. Khublei.