Ka jingpang Covid ka long ka lad kamai spah jong ki Hospital: AIM

Shillong:Ka Awaken India Movement, Meghalaya myn sngi saitjain, ka la pynlong ia ka jing ialang shong kyllain myngngor ha Madan Malki, ban pyrshah ia ka jingpyn bor ka sorkar jylla ia ki paidbah ban shim tika iada Covid bad ia ka jingpynjari jong ka sorkar ia ki SOP.

Ha ka jingkren na ka liang ka kong Reality Syiem, ka la takrain ia ka sorkar kaba la pyntieng pyn syier ia ki paidbah da ki buit kiba bun ban pynngop ia u paidbah ban shim ia kane ka tika. Na ka liang ka kong Reality, ka la kylli ba hato ju don mo ka rukom ba ki hospital bad ki jaka ai jingsumar ba kin test ia ki nongap ia kiba leit thiah pang ha ki jaka sumar. Shuh shuh na ka liang jong ka, ka la ong ba kane ka dei tang ka buit ki jaka sumar ban kamai spah ha ka kyrteng ka Covid na ka bai test na kiba shait ba khlain. Ka la iathuh ruh ba ki don ki briew kiba shu iap ei tang na ka daw ba kim ioh jingsumar na ka jingshitom ba la ban ia ki hynrei ki hospital ki la sumar shuwa pynban ia kata ka jingpang Covid. Kane ka dei ka khubor sha ka tnad ka koit ka khiah bad ki nongtrei jong ka, da kaba pynkynmaw ba ha kawei ka sngi kin sa shah tian bishar ha u Blei uba hajrong ia ka jinglehthok jong ki ia ka ha ka kyrteng ka Covid namar ha ka jingshisha wat tang kata ka jingpang Covid ruh kam don satia hynrei tang ka baiong klieh, pynshit, pynhiar kaba la ju don naduh mynshuwa eh, bynrap shuh shuh ka kong Reality.

Na ka liang u Bah Banshai Marbaniang, u la kynthoh tyngeh ia ka sorkar kaba la pynbor bad pyntieng pynsyier ia u paidbah ban shim ia ka tika, da kaba ong kane ka long kaei kaei kaba ym lah pdiang namar katkum ka Article 19 ka riti synshar ka ai laitluid ia uwei pa uwei u nongshong shnong ban jied ia kaei kaba u kwah bad kaei kaba ki sngewdei. Shuh shuh na ka liang une u nong ialam ka AIM u la iathuh ba ki la don bun ngut ki briew kum ha Kolkata, Mumbai, Assam bad kiwei ki jaka kiba la shuh iap ei, tang namar ba ki shah injek iada Covid-19. Wat ha ki Hospital sorkar lada leit ai test Covid, hap siew na ka pla lajong bad kane hi ka khlam thaw briew ka la pynlong ia ki hospital kum ki jaka shna pisa.

Kat kum ka Indian Council of Medical Research ka la kren shai ba ka sorkar kam lah stia ban pynbor bad pyniapher uno uba shim tika bad uno u bym pat shim. Ka Bar Council of India ka la ai jingthoh ruh wat sha duh u myntri rangbahduh ka India ba ka long kaba beain ban pynbor ban shim tika bynrap shuh shuh u nongialam ka AIM. Na ka liang utei u nongialam u la kyntu ba ki paidbah kim dei ban tieng ban smiej lada ka sorkar ka pynborhynrei ban ieng iakhun kat kum ki hok ki riti ba la ai da ka riti synshar jong ka India bad u la dawa na ka sorkar ba ka dei ban pyndam noh syndon ia ki Protocol Covid.