Ka jingpang Covid-19 kala pynsohsat ia baroh ki paidbah ha kylleng satlak ka pyrthei

Riki Mukhim,

Publicity,

HYC War Jaiñtia

Ka jingpang Covid-19 kala pynsohsat ia baroh ki paidbah ha kylleng satlak ka pyrthei hynrei haba ngi phai hakane ka jylla jongngi shibun bah ki longiing longsem kiba duk ba kyrduh kila lynga mynsiem halor ka jingbym ioh ia ki marbam mardih naba Kim kotbor ban thied shibun kumba thied lem ki wei shisien thied.Wat kito kiba la biang ka ioh ka kot ruh ki lynga ki pisa naka jingbym ioh tikna iaki marbam mardih ha dukan.

Haka jingiohi jongnga khamtam kum hakane ka por ka jingialeh thma ka long palat ban iaka thma u Corona Virus naba naka jingjur ka jingiaknieh marbam mardih ha dukan, ki riew shim kabu kim salia ban thom bor bad khñioh beiñ iaka hok u paidpah dakaba pynkiew dor iaki marbam mardih.Wat hapdeng baka sorkar ka la maham ban pynshitom iakiba pynkiew dor iaki marbam mardih hynrei imat katei ka aiñ kam long eiei hakhmat jongki riew shimkabu.

Hakine ki shisngi arsngi shibun ngut ki riew paidpah kila ud shanga naka jingpynkiew dor iaki marbam mardih hynrei nga la ong iakitei ki riewpaidbah ba haba phi leit thied jingthied ha dukan phi dei ban pan cash memo khnang ba kino kino ki riew shim kabu kum hakane ka por kin ioh iaka jingpynshitom kat kum ka kam jongki. Kaba sngewsih ka jubab banga ioh naki tei hi ki riew paidpah dakaba ki ong bakim kwah ban leh kumta namar lada ki leh kumta ka long kumba ki bishni iaka kamai ki trai dukan, bad kim kwah hi ruh ban iasniew para briew. Nga la iathuh iaki bakim dei ban don kumkata ka mynsiem hynrei dei ban iaid beit shakhmat halor ka hok bad jingshisha khnang ban lah ban pynduh jait iaki riew shim kabu haka imlang sahlang naba khlem ka jingiatrei lang kane ka kam ka long kaba jwat haduh katta katta, namar kata phi kum ki paidpah phi dei ban sngewthuh kumno ban ieng iada ban nym ailad iaki riew shim kabu bakin khñioh beiñ iaphi namar lada phi ai lad iakum kitei ki jingmlien basniew kan buh jingeh iaphi hi ki paidbah, namarkata haba phi leit thied jingthied ha dukan dei ban pan beit iaka cash memo bad lada kim ai cash memo phi lah ban pyntip shaki bor shnong ne sha ki bor ka aiñ khnang ba kin ioh ban leh iakaba donkam.

Haba phai pat sha kito kiba wan naki longiing long sem bakup shiliang sem shiliang, la sngew dei ban kyntu jur iaka sorkar jylla bakan bthah ia baroh ki 60ngut ki nongmihkhmat ban noh synniang dakato ka Scheme kaba ki ioh 2klur tam man la u snem bad dei tang kane ka lad lah ban pynim ia u duk u suk naka jingshah iap thngan naka jingshong iing 21sngi kynthih lym kumta kam don jingmut kato ka 2 klur tam lada ki nongmihkhmat kim iarap iaki paidpah kum hakane ka por.

Hakaba iadei pat bad ka jingai synniang ka sorkar iaki nongbylla nong sngi shisien shi taiew iakito kiba la dep register teng ialade, la sngewdei ban ai jingmut iaka sorkar namar dang bun ki briew ha nongkyndong kiba bylla nongsngi ki bym pat dep register ialade namarkata la kyntu iaka sorkar jylla ban synniang lem sha baroh ki longiing baduk kiba don iaka card BPL khnang ba ka jingiarap kan long salonsar iaki briew kiba duk.

Kumjuh ruh la kyntu iaki Balang bad Seiñraij bapher bapher bad iakito riew shimet kiba biang ka ioh ka kot balada long kaba lah sngewbha iarap synniang lem katba phi lah ka bor shaki briew kiba duk khnang baka ri bad ka Jaidbynriew jongngi kan lah ban ialeh pyrshah naka khlam jingpang Corona Virus.