Da u Scholar Lawriniang
Nongthliew West Khasi Hills
Ka jingwan bad ka jingtrei borbah ka jingpang Covronavirus (Covid 19) ha ka pyrthei baroh kawei kynthup wat ha ka jylla jong ngi ruh, ka la long ka jingkhihwin bakhraw ia ki jaitbynriew ha ka pyrthei baroh kawei.
Ka la don ka jingkhang dam ia ka leit ka wan ki briew na kawei ka ri sha kawei ka ri, ka la don ka jingkhang dam ruh wat ia ka leit ka wan shi para ri. Ym tang katta ka la don ruh ka jingkhang dam wat ia ka trei ka ktah,ka khaii pateng, ki iew ki hat, ki skul, ki jaka mane blei, bad bun kiwei kiwei kiba kane ka jingpang ka la pynsohsat ia ki bynriew shi anieh pyrthei. Wat shi ba ha iing ha sem ngim long laitluit shuh ha ka rung ka mih ngi kylla long jngai iwei na iwei bad ngi la kylla long mraw ruh ha kane ka jingpang. Bad ngi don ruh ha ka jingkordit ba khraw ha ka long briew manbriew jong ngi tang namar ka jinglynshop ka jingpang Coronavirus.
Ka jingpang Corona kam don ka bor tang ban pynsohsat ia ka long briew manbriew jong ngi lane ba kan teh kan khum tang ia ka trei ka ktah, ka khaii ka pateng, ka leit ka wan jong ngi, hynrei ka don ruh sa kawei pat ka bor kynsha ka ba rieh jong ka namar ka don bor ruh wat ban khang ia ki jingialum lang ki paidbah ban shakri ia U Blei ha ki jaka mane blei jong ngi lane ha kiba kham bun paidbah la ka long wat ha iing ha sem. Bad ka don ruh ia ka bor ban pynpait pynpra ia ka longbriew man briew jong ngi.
Naduh ba ka jingpang Coronavirus ka la sar kylleng ka pyrthei ngi iohi ruh ia ki dak ka jingiapait ia pra hapdeng kiba bun ki ri jong ka pyrthei, ka jingiapyni bor bad ka jingialeh kawei ia kawei ka ri kumba la thoh ha ka ktien U Blei. Bad ka thma ka iing ia ka iing para ka la jia, kane ka jia wat ha ka jylla bad ki shnong ki thaw baieit jong ngi.
Naduh ba kane ka jingpang ka ioh iuh kjat ha jylla jong ngi, nga iohi dei hangne ruh ka ioh wan iuh kjat bun eh ka mynsiem ka jingiakynad, jingiabishni, jingiapeit matdong iwei ia iwei, wat hapdeng shi iing shisem, namar kane ka jingpang ka don ia ki aiñ ba sniew ban pyniapait ia pra. Bun ki jingjia bym iahap bad ka imlang sahlang ki jia ha ka jylla jong ngi naduh ba wan kane ka jingpang.
Ki jingjia ba lai phewjait ngi mad ha kum kane ka por naduh ha iing, ha shnong jong nga jong phi ka jingiabishni ka jingiapeit matdong ka jingia kawang ktieh, ka jingiakynnoh ba laiphew bad ki jingjia khyllah bym ju kham jia ki jia long bad mih tang namar ka jingwan kane ka jingpang. Ka jingiaklumar ha ki shnong ki thaw wat haduh ban ia shoh ia dat pynmynsaw bad bun ki bynta kiba kane ka jingpang ka la wanrah kum ka jingpyniashun bad ka jingpyrshah iwei ia iwei. I kumba kane ka ka jingpang ka donbor da kaba suk wat ban pynpait pynpra wat ia ka jinglong shitylli shnong ka thaw bad ka iing ka sem.
Kine kim shym jia tang ha jylla jong ngi hynrei ki jia ruh wat ha ka ri jong ka pyrthei. Bun ki paidbah kiba la pynlong ia ka jingiakhih pyrshah namar ka jingshah teh shah khum ha kane ka khlam bad kane ka jingiakhih ka wanrah ruh ia ka jingumsnam hapdeng ka ri bad ka ri ki bynriew para bynriew.
Kat kum ka ktien U Blei ka ong: Naba ka kynja bynriew kan ieng ialeh kawei ia kawei, ka hima ia ka hima. Mathaios 24:7. Kumba U Blei u la ai bor ia u soitan ban pynjot (Job 1:12) kumta ruh u la sdang ia ka bor jong u ha kum kane ka por mynta ban sdang synshar ia ngi da ka jingkah dum noh ia ka bor ka jingshai U Blei. Kum ki khun U Blei to ngin phai sha U Blei ha ka bor jong ka jingdwai ba ngi lah ban prat lynti ia ka jingkah dum u soitan. U soutan u wan ia ka ban pynjot hynrei U Blei u wan ia ka ban pynim.
U la pynim ia ka mynsiem jong nga ha ka ba suk na ka thma kaba ialeh ia nga na ba ki la long shibun kiba ia leh ia nga. (Salm 55:16)
Ngi klet bad ngin ia map, ia kaba la dep, ngin thaw thymmai katba ka sngi at sep.
Amen and Amen.