Ka jingong ban don jingkylla Sorkar, dei ka jingkren ilekshon, ong u symbud MR

Shillong:U Nongïalam ka NPP bad Symbud Myntri Rangbah ka Jylla u Ma Sniawbhalang Dhar ha ka sngi Palei, ula kyntait ïa ki khubor hamsaïa ba kan sa don ka jing kylla ha ka Sorkar Meghalaya Democratic Alliance (MDA)-2 ha dien ka ilekshon ha Sohïong.

Ka jingïathep vote ha ka ilekshon MLA ha Sohïong, la pynlong hynnin ka sngi Balang bad ka jingñiew ïa ki vote kan long ha ka 13 tarik mynta u bnai.

Hynrei, u symbud myntri rangbah, ula ong ba ki paralok ba ïatreilang ha ka Sorkar MDA-2 ki ïadon ïa ka jingïadei ba ïajan bha bad ma u hi um ïohi satia ban don ka jingkylla ha ka Sorkar hadien ka ilekshon Sohïong.

Halor ka jingkam na baroh arliang mamla, u Ma Sniawbha ula ong ba baroh kine kiei kiei ki dei tang ki “Jingkren ilekshon” bad kaei kaba jia ha ka por ilekshon kan kut tang ha ka ilekshon.
Haba kylli halor ka jingïohi jong u ïa ka ilekshon, u Bah Sniawbha ula ong, “To ngin ap ïa ka sngi ñiew vote,” bad bynrap, “Ka NPP kan kam ba ka NPP kan jop bad ka UDP ruh kan kam ba kan jop”.