Shillong: U Chief Executive Member ka Khasi Hills Autonomous District Council (KHADC) bad nongialam ka United Democratic Party (UDP), Bah Titos W Chyne u la ong ba ka jingkynnoh ba ka UDP ka dei ‘Party Khasi’ ka long tang ban ialam bakla da kiwei ki seng sain pyrthei ha ka elekshon jied nongmihkhmat sha ka Ïing Dorbar Thawain ka Garo Hills Autonomous District Council (GHADC) ka ban long ha ka 12 tarik Mynta u bnai.
Haba kren ha ka jingialang ialap elekshon ha Darugre Constituency, ha kaba u la pan jingkyrshan ruh bynta u Arman G Marak, kyrtong na ka Party, u Bah Titos u la ong, “Ka UDP ka dei ka seng saiñpyrthei jong ka Jylla Meghalaya bad kaba la don ia ka nongrim naduh ka por ka All Party Hill Leaders’ Conference (APHLC) bad kham hadien ka Hill People’s Union (HPU) bad mynta pat ka United Democratic Party (UDP)”.
Da kaba kynther kylla ia ki jingkynnoh, u Bah Titos u la ong, “Ka Congress ka la synshar bun snem ha GHADC bad na ka daw jong ka mih ki kynrum kynram ha ka GHADC naduh ka rukom thung nongtrei haduh ba la long palat pud, katba ka National People’s Party (NPP) (kaba lam khmat ia ka Sorkar Jylla Meghalaya) ka la bat ia u lakam synshar ha GHADC la katto katne snem mynta hynrei kam shym lah ban weng ia ki jingeh ne pyniaid beit pyniaid ryntih ia ka naduh ka kam pisa tyngka”.
U la ong ba kane ka pyni ba ki seng sainpyrthei kiba la ithuh ha Ri India kim lah thaw pyrthei ha ka ban pyniaid beit pyniaid ryntih ia ki ADC lait na ki seng sainpyrthei na ka Jylla. “Ka UDP ka dei ka seng saiñpyrthei na ka bynta ki riewlum ka Jylla bad ka sngewthuh ia ki mat ia kren ban wanrah ia ka synshar khadar, ka rukom pyniaid bad treikam, ka rukom bat khyndew bat shyiap, ka riti dustur, ka ktien ka thylliej bad kiwei ki mat iada ia ka jinglong kyrpang kum ki riewlum”, la ong u Bah Titos.
“Phi la kyrshan ar tylli ki seng sainpyrthei (Congress bad NPP) bad phi la ïohi ïa ka jingmih”, u la ong. Da kaba ong ba khlem ki ADC ki jaidbynriew riewlum kin don ha ka jingeh, u la ong, “Ka UDP ka pan ïa ka jingkyrshan bad kyntu ia phi ki paidbah ban ailad ia ka khnang ban ïoh wanrah ka synshar khadar kaba khuid ha GHADC”, u la ong.
Ka Darugre kan sakhi ïa ka jingïakhun hapdeng ki saw ngut ki kyrtong ba kynthup na ka Congress, NPP, UDP bad uwei u kyrtong shimet. Ïa u Arman yn kyrshan ruh da u Deputy Chairman barim ka GHADC bad MDC ba mynta na Darugre, Mettrinson G Momin uba khlem treh ban iakhun ha ka elekshon GHADC ba mynta bad uba la pynthikna ban kyrshan tyngeh ban pynjop ïa u kyrtong ka UDP.
Na ka liang u Arman u la ong ba ka UDP ka don ïa ka dak ka jingkhuid jingsuba bad kane ka dei ka daw ba u sa pynïasoh bad ka UDP. “Ka UDP ka khuid ym kum kiwei ki Party bad ngin wanrah ka jingkhuid ha ka GHADC bad pynkhuid ïa ka huri hura hangtai”, u la ong da kaba kyntu ia ki paidbah nongshong ban ailad ia ka UDP kaba pynieng 18 ngut ki kyrtong ha kane ka elekshon.
Phi don ban ong eiei?