“Ka jingngeit biej”

AIS Suja

Ka jingngeit biej (Superstitious), ka long kaei kaei ka jingngeit kaba don ha u briew ne ka briew ha shi tyllup pyrthei, khamtam ha ki juk ba mynshuwa bad wat mynta ruh, kane ka rukom jingngeit biej ka dang don wat hapdeng kiba la nang la stad bad wat ha kita kiba la khot ialade ba ki long ki Khristan.
Ka jingngeit biej, ka pyllong ia ki briew ban sheptieng ne artatien ba haba jia ei ei ha khmat jong ki, ki ong ka bym bit ne ka bym long, kum ka nuksa haba ka miaw baiong ka jam sha shiteng (crossing) surok ne lynti uta u briew u hap ban ieng syndon bad bynthiew ne ai ba uwei pat u iaid ha khmat khnang ba kan ym jia kaei kaei kaba sniew kaba ma. Kum kine kiei kiei ki long tang ki rukom jingngeit biej bym don jingmut ne nongrim haei haei ruh. Ki don shibun kiei kiei ki rukom jingngeit biej ym tang ha ka pyrthei hynrei wat ha ki Ri jong ngi hangne dang synshar ka ngeit biej (Superstitious) ha bun ki bynta.
Ngi im ha ka juk jingstad, ka juk science and Technology ha kaba ka jingstad ka la kiew shaba palat, hynrei u briew pat u dang sah hapoh ka jingngeit biej. Ha ka science, ym lah ban shu ia ngeit biej khlem da pynshisha (proof). Bad ia kaei kaei kaba ym lah ban proof kata ka long ka bym lah ban ngeit bad ka science. Lada kylli kaei ka science ka science ka dei kata kaba lah ban pynshisha da ki experiment ne da ki kam.
Kumta ka jubab ka long “Science is doing”. Ha ka science ym don ka jingngeit biej da kaba shu ngeit oh ba ong uta uta kumta kumta.
Ki riew hyndai ki ong hapoh u Bnai (Moon) don ki briew kiba ia dung kba bad bun ki ngeit ba ka long kumta. Hynrei ka science pat ka la shem ba ym don briew badung kba hapoh u Bnai hynrei ki don tang ki lum bah kiba tyrkhong. Bad kane ka pyni ba ka jingngeit biej ka don naduh ki por mynshuwa kulong kumah.
Ka jingngeit biej, ka pyllong ba ki briew kin ia sheptieng bad kane ka jingsheptieng ngeit biej ka tynrai jong ka dei na u soitan namar ka jinglong u soitan ka long ban pynsheptieng khnang ba ki briew kin ngeit biej bad ba da kata ka jingngeit biej kin ym poi sha kata ka jingngeit ha u khun u Blei.
U Apostol Paul um ngeit shuh ha kata ka jngngeit biej: u ong – “Kata kaba nga im mynta ha ka doh nga im da ka jingngeit kein kaba ha u Khun u Blei” Galatia 2:20.
Te hangne, kum kita kiba la khot ialade “Ki Bangeit” kim donkam shuh ia kata ka jingngeit biej namar kaba ngeit ha u khun u Blei ka long hi ha u Blei bad ha ka ktien jong u, bad kane kam dei kata ka jingngeit biej, hynrei ka jingngeit ia kaba u Apostol Paul hi da lade u la phla.
Kumta kum kiba la ngeit ha u khun u Blei bad ha ka ktien jong u, ym donkam shuh ban tieng iano iano haba ki jingpynsheptieng ki wan namar baroh ki jingpynsheptieng ngeit biej ki wan na u soitan. Kumta wat shah ba u soitan un pyntngit ia ki jingmut jingpyrkhat da kita ki rukom ngeit biej, namar lada ailad ia kiba kum kine ki rukom ngeit biej, u bangeit un ym lah ban pyndonkam ia ka kyrteng u Jisu pyrshah ia u soitan.
Kumta ha ka jaka ban ngeit biej kulmar, phai sha u Blei (submit to God), dei hangta kita ki ngeit biej kin jah la ka jah. Dei na kata ka daw ha ka shithi u Jakob la thoh – “To ialeh pyrshah ia u soitan, te un phet iap noh na phi. To wan hajan ia u Blei te un wan hajan jong phi” Jakob 4:7-8.
U Jisu u Khun u Blei um kwah ba ki briew baroh kin im da kata ka jingim ngeit biej hynrei tang da kaba ngeit ha ka ktien jong u kaba don ka JINGSHISHA. “Phin ithuh ia kata ka Jingshisha, bad kata ka Jingshisha, kan pyllait noh ia phi” “The Truth will set you free” Ioanis 8:31-32.