Ka jingmih ki MLA, kam pynduh jingkyrmen ia ka Congress, ong U bah PN Syiem

Shillong:U bah PN Syiem, Working President ka MPCC, u la pynpaw ba lyngba ka jingmih noh jong ki 12 ngut ki MLA Congress ban pyniasoh sha ka AITC bad kumjuh lada ki 5 ngut ki MLA Congress, kiba dang don ruh lada ki mih noh kan ktah shibun ia ka party, hynrei kane ka jingmih jong ki MLA kam mut ba ka party kan ym lah ban jop ha u snem 2023.

Haba ia kren bad ki lad pathai khubor na ka liang u bah Syiem u la ong “Ngam tharai ba kane ka jingmih jong ki MLA kan wanrah ia ka jingduh jingkyrmen ban jop ia ka election 2023”.
U la bynrap “Kum ka nuksa ba ka party NPP ha u snem 2013 ki don tang 2 ngut ki MLA, hynrei mynta ki la don 20 tam ki MLA ha kaba ka congress ka don ka jingkyrmen”.

U la ong ruh ba ka party Congress hi haduh mynta ka dang don ia ki nongialam kiba lah ban wanrah ia ka jingiakhun ka ba eh na ka bynta kiwei ki party kum u bah R.V Lyngdoh, u bah Charles Marngar, u bah HDR Lyngdoh bad u bah PN Syiem.
U bah Syiem, u la ong ba ki jingkynnoh ba ka Congress kan ym lah ban jop ka long kaba bakla, namar ba ka jingiakhun ha u snem 2023 kan long hapdeng ka party National People Party, ka United Democratic Party bad ka Congress katba ka party All India Trinamool Congress ka lah ban ioh ia ka seat tang na Garo Hills hi, hynrei ha Khasi jaintia kan long kaba eh ba kin ioh seat.