KA JINGMA JONG KA SOCIAL MEDIA HA KA POR MYNTA (LOCKDOWN)

Dr. Mebandabha Rabon (PhD)

Ka social media (kum ka Facebook, Whatsapp, YouTube bad kiwei kiwei) ka dei kawei na ki lad kaba ai shibun ki jingmyntoi ia kiba nang ban pyn donkam ia ka ha ka rukom kaba dei. Ia ka social media ha ka juk ba mynta la ju pyndonkam da kiba bun, naduh kiba rit haduh kiba lah rangbah, kiba lah nang lah stad bad ki bym nang bym stad ruh kumjuh, kiba duk ne kiba riewspah ruh.

Ym lah ban len ba ka jing pyn donkam ia ka social media ka ai shibun ki jingmyntoi ia ki briew khamtam kum ha kane ka por mynta ha kaba baroh ngi hap ban shong beit ha la ing la sem. Ka social media ka long kum ka paralok ba jan jong ki briew ha kaba ngi lah ban ia kynduh ne ban ia kren bad la kiba ieid ba thoin, ki paralok parajor kam pher watla ngi lah ban don sha jngai iwei na iwei. Hynrei hapdeng kiba bun kine ki jingmyntoi kiba ngi lah ban ioh lyngba ka social media, sngewsih pat ban ong ba ki don ruh ki jing duhnong namar ki don kiba shim ia ka kum ka lad ban ialam bakla ia kiwei pat.

Kaei kaba nga kwah ban pashat jingmut hangne ka long ka jingpur sted shaba palat jong ki khubor lamler ha kaba ia dei bad ka jingdon jong une khniang jing pang uba baroh ngi ia tip kum u COVID 19 ne uta u Corona Virus uba la sar lut ha baroh kawei ka pyrthei. Kum uwei na ki nong shong shnong jong ka Ri nga kwah ban kyrpad ia kito kiba ju mlien bad kiba sngewtynnad ban pyn phriang ia ki khubor lamler (Fake News) ba kin sngewbha ban sangeh noh shi syndon ia kane ka kam thok kam shukor. Ki khuubor lamler bunsien ki ju wanrah ka jing ma ia baroh ka imlang ka sahlang, khamtam ia kito ki bapli ki bym nang ban thoh ban pule namar ki shu shaniah beit ha kiwei kiba lah nang ban pule bad ban thoh.

Shwa ba ngan pynkut nga shu kwah ban kyrpad ia ki paidbah baroh ba ngim dei ban long kiba shu ngeit beij ne ngeit kulmar ia kino kino ki jingpynbna. Sngewbha ban da pyntikna ne wad bniah bha haba phi ioh sngew ia kino kino ki khubor ne ki jing pynbna kiba phim sngew tikna. Bud ia ki khubor ne jing pynbna kiba wan na ki bor Sorkar, Ki Tnad Pulit, Ki Tnad ka Koit ka Khiah bad na ki nong pathai khubor kiba lah ai bor da ka Sorkar.

To ngin ia shah shitom shi por, trei lang bad ka Sorkar. Ha kawei ka sngi ngin sa jop ia une u Corona Virus da ka jing ia treilang jong baroh.
Shong ha ing na ka bynta ka jing bha ka lawei ka ba lashai la shisngi.
STAY HOME STAY SAFE.
Khublei Shibun