KA JINGLONG JINGIM KABA KHUID

Rev. B.P. Pohsngap

Ka jinglong jingim kaba khuid ka long kaba ha khlieh tam eh. Ka jinglong ba pyrshah ia kane ka dei ka jinglong jingim bym khuid. Ka jinglong bymkhuid ka pynwit ka pynthud ka lah ruh wat ban khanglad ia ki bor ba pynkhlaiñ ne ia ka jingiaid shaphrang ha kiei kiei baroh.

Shisien ha kawei ka por katba ngi wan na kawei ka jaka bad ngi ia shong da ka Truck, kyndit khlem poi pyrkhat kata ka kali ka la sangeh noh bad ka khlem start shuh. Ngi la ia khuslai namar ka jingleit kaba dang jngai. U nongñiah ia kata ka kali, u la peit ula la khmih bniah shapoh bad u shem ba u pipe petrol u don ka jingbymkhuid, na kata ka daw ka kali ka khlem lah shuh ban iaid. U la pynkhuid, u la pynkhuid haba u la start kata ka kali ka la im. U thied tynrai ka jingngeit jong kiba ngeit u dei ka jinglong jingim kaba khuid. Haba don ka jingkhuid hangta u don U Blei; haba don U Blei hangta ka jingkhuid ka paw.

Ka jingkhuid ka dei ka jingshai, Kaba lam lynti sha bneng sha U Blei. “Suk kiba khuid ha ka dohnud kin iohi ia U Blei”. Ngin ia kynjih bad jngoh, ngin ia thew bad ia woh ban khun tyngeh ban pynwan sha lade, la ngi la don ne em ha kata ka jinglong jingim kaba khuid.

1. KA MOHOR JONG U KHRISTAN BA SHISHA.
   Ha ki por hyndai, kata ha ka por u Moses la ju thaw ia ki jain phong na ka bynta ki lyngdoh, ba kin phong ban pyni ba ki dei ki lyngdoh jong U Blei. Kawei na ki dak ne ka Mohor ba ki shna ka dei ka Mohor ka jingkhuid Exs. 39:30. “Ki la thaw ia ka sla syntiew jong ka Pansngiat bakhuid da ka ksiar ba nylla bad ki la pruid halor jong ka, kum ka jingpruid ka Mohor, ka JINGKHUID HA U TRAI? Ka jinglong khristan kaba shisha ka dei ka jingkhuid ha ka jinglong jingim baroh. Ha ka snem 1913, la wan poi I Rev. J.J.M. Nichol’s-Roy (ba khot ieit i Bah Joy) haba i ialap ha kawei ka madan kaba ha shnong Padu, i la kren ia ka khubor 1 Pet. 1:15. Kumba uta uba la khot ia phi u long uba khuid to long ma phi ruh kiba khuid ha ka jinglong jingim.” Kane ka khubor kaba ktah jur ia ki briew khamtam kiba la ngeit lypa, nalor ba ki kwah ban im riewblei shisha, ynda haba ki la ioh sngew ia kane ka khubor, ki la aiti sha U Trai ban pynjanai ialade ha ka jingkhuid jingphla ia ki pop, bad ka dei kane ka khubor ba ka Balang U Blei ka la ioh suhthied na kaba wat ki tymmen basan rangbah ki la ioh ka jingpynkynduh bad aiti sha U Trai, ki la iaid ha kane ka lynti na ka Balang U Blei. Kane ka Mohor u khristan uba shisha, ka dei ban paw ha uba ngeit, haba iohi ia u nabar bad khambun ka jingkhuid kaba hapoh ka dohnud bad ka mynsiem kum ha khmat jong U Blei. “Suk kiba khuid ha ka dohnud kin iohi ia U Blei” Mt. 5:8.
2. KA LYNTI U KHRISTAN BA SHISHA.
   U Nongiathuhlyap Isaiah, u la kren bad u la iohi ia kane ka lynti kaba u khristan u dei ban iaid 35:8. “Te ka lynti bah kan long hangta bad ka lynti yn khot ia ka ruh, ka lynti ka jingkhuid, kiba tngit kin nym iaid halor jong ka hynrei kan long ia kito, ki nongleit jingleit, shisha keiñ kiba bieit, kin nym bakla ha ka.” U Sekharaiah ruh u la iathuhlypa 14:20 “Ha kata ka sngi kan long ka jingkhuid ha U Trai ha ki shakuriaw ki kulai…..”. Kane ka dei ka jingiathulypa ba ia ka jingkhuid yn ia pynsawa ha kito baroh ki ban rung sha kane ka lynti U Trai, ba ka dei ka lynti ka jingkhuid.
3. KA LYNTI KABA KHLEM JINGPYNREM HA KA JINGWAN U TRAI.
   Ka jingim khristan, ka dei ka lynti iaid pilgrim kaba thew ban poi sha ka lawei ka jingim, kaba ka lawei ka ban sa wan, ka ban hap ieng ruh ha khet bishar, la yn ioh ia ka jingpyksan ne ka jingpynrem ha khmat U Blei. U Apostol Paul u pynkynmaw ia ki nong Thesoloni. 1:3:13. “Khnang ia ka ban pynshkem ia ki dohnud jong phi kiba khlem jingrem ha ka jingpynkhuid hakhmat U Blei Uba U Trai jong ngi, ha kaba ka jingwan U Jisu Khrist Uba U Trai jongngi lem bad ki riewkhuid jong U baroh”. Ka jingim bakhuid ka dei ka bor bah ka ban pynkmen ia u briew ha ka sngi ba U Jisu Un wan ban rung sha kane ka lynti dei lyngba U Jisu Khrist 1.Ioan 1:7-8. “Ka snam U Jisu ka pynkhuid ia ngi na ki pop baroh. Lada ngi phla ia ki pop jong ngi u long uba iaineh bad uba hok, ban map ia kita ki pop jong ngi, bad ban pynkhuid ia ngi na ka bym hok baroh”.
4. KA JINGSNENG SYMPAT KHNANG BAN IOH IA KA JINGKHUID.
   Ka jingieit jong U Blei ka paw ha ka ba wat kito kiba la jngai kiba la sakma na ka lynti jong ka jingkhuid hynrei lada ki kloi ban sngewthuh kumno U kwah ba kin wan phai sha U da kaba U ai ha ki ia ka jingsneng jingsympat ba kin kylla kaba mut. Heb.12:5 “Ko khun jong nga, wat ñiew sting ia ka jingsneng sympat na UTrai, lymne wat sngewtlot ngai lyngai haba la sneng ia me da u, namar ia uba U Trai U ieit, U sneng bad U sympat ia u khun baroh ia uba pdiang 9-10 “ U Kpa ki mynsiem jong ngi. U sneng ia ngi khnang ia ka ban myntoi ia ngi, ba ngin ioh bynta na ka jingkhuid jong U”. Oh ka jingieit U Blei ka khraw shisha ia ngi ki briew, U ai ka bor sngewthuh ha la ka mysiem wat ha shwa ban dkut mynsiem ban pynkhuid na ka pop kaba dang sah. Kawei ka longkmie shuwa ba kan dkut mynsiem ka la phah khot ia u rangbah kata ka Balang ban wan kloi kloi, haba uta u rangbah u la poi hangta, ka la ong ia sngewbha map ia nga, ba nga la kren beiñ ia phi. Uta u rangbah u la ong, nga la map to ngin ia duwai bad la ia duwai bad i la suk jai ka mynsiem. Bneng ka long ka jaka khuid, dap da burom bad jingkhuid, pop kan nym ioh rung hangta, la ki khyrdop ki rynghang, jingsniew jingtngit phar ki khang, pop kan nym ioh rung hangta.
   Parabangeit baieit ha U Trai, to ngin peit ia lada marwei marwei, la ngi la iaid ne em ha ka lynti ka jingkhuid, namar dei tang kane hi ka lynti ka ban lam ia ngi sha ka burom ka hima U Blei.