Bah Philip Marwein
Ki paidbah jong ka Meghalaya ki la mad ia ka jingeh kaba khraw halor ka jinglip khah khah jong ka ding ilektrik, bad kane ka jinglip ka la wanrah shibun ka jingduhnong ia baroh. Ka jinglip jong ka ding ilektrik kam dei tang ha sor Shillong hynrei khamtam, ha ki nongkyndong. Ha ki jaka kyndong lei lei ka ding ilektrik ka shu lip lynter da ki taiew bad wat da ki bnai ruh hynrei na ka liang ka MeECL ka shim bai ding ilektrik thik thik. Kane ka dei ka kam pynkhein ia ka hok longbriew manbriew, ka dei ka kam thok kam shukor bad ka kam tuh ia ka hok jong ki paidbah. Kaba lyngngoh pat ka long ba ki paidbah jong kane ka jylla ki shu shah katba leh kane ka kompeni sorkar bad shu kut tang ha ka jingud bad ka jingkhnium. Ym don wat tang iwei ruh ba nud ban iakhun pyrshah ia ka MeECL da ka mokutduma PIL ban ioh ia ka hok lajong. Kaba lyngnoh ka long ba ka MeECL ka pynmih ding ilektrik na ki power project lajong bad ia kaba duna ka thied ia ka ding na ka kompeni NEEPCO bad nawei ban pynbiang ia ka jingdonkam ding jong ki paidbah ha ka jylla. Kaba lyngngoh ka long shano ka leit lut kane ka ding ilektrik. Dang shen ka MeECL ka la siew jin haduh 429.40 klur tyngka ia ka bai ding ilektrik jong ka NEEPCO. Shano ka leit lut kane ka ding ilektrik? Hooid, ka dang dei ban siew peisa shuh shuh sha ka NEEPCO namar ka donkam ding ter -shi- ter hynrei ym dei ban don ka daw kaba shongnia ban duh ding (duh light) khah khah ha ka jylla. To lada ka NEEPCO ka ot noh ia ka lain namar bymsiew ia ka bai ding te ngi lah ban sngewthuh, hynrei ka NEEPCO kam leh kumta.
Ka sorkar Meghalaya ruh ka shu sngap mynthi ia kane ka jingeh jong ki paidbah. Kane ka nang buh ia ki paidbah ha ka umdum. Ki lyngngoh ka la jia aiu ia ka MeECL? Shano ka ding ilektrik? Ka jingshisha halor kane ka dei ba ka MeECL ka don shibun ki jingeh kiba la syrtap-pa-syrtap. Kine ki jingeh ki la bun syrtap bad la donkam ban khyllie naduh na trai bah. La hap ban rat ia ki jingeh kiba naduh dyngkhong, naduh ka jingbymnang bad jingbymlah ban pyniaid haduh ki rukom treikam haduh ka jingbamsap kaba la seng nongrim naduh ki por jong ka MeSEB. Ia kane ka Kompeni sorkar la hab ban khynra naphang ban beit toin. Ia mynta ym don ba lah bad ym don ruh ba nud, wat ka sorkar ruh kam shlan satia ban leh ia kaba donkam. La shu tei pop ia kane ia katai lane la shu ai daw da kumne kumtai ia kane ka jingduh light khah khah. Ka MeECL, nalor ba kam lah ban pynbiang ia ka jingdonkam ding ilektrik ha ka jylla, kam treh pat ban shim ia ka rai ban pynmih bording ilektrik na ki project kiba bun. Shano kita ki Kynshi-I, Kynshi-II, Umngot HEP, Umngi HEP, Ganol HEP, Khri HEP bad kiwei? Balei ym pyntrei noh shaid shaid ia kine ki project ban ioh ding ilektrik bad lada don ki jingeh balei ym lah ban weng ia kita ki jingeh? Ka paw kumba ka Power Department jong ka jylla kam treikam ei ei. U leh aiu u Power Minister , ki leh aiu ki heh ki hain kiba don ha ka power Department? Balei kim pyni ia ka kam ba ki trei. Kaba lyngngoh ka long ba ka MeECL bad ka Power Department ki shu sngap mynthi ia kane ka jinglynga ki paidbah. Balei kim wan shakhmat ban pynshai ia ki paidbah ia kane ka jinglip ding ilektrik kaba la palat liam? Ngi ngeit skhem ba u Power Minister bad ki heh ki hain jong ka Power Department kin shah shkot ia kane ka jingud ki paidbah bad kin sdang pyni noh da ki kam. Namar ki paidbah ki la bitar palat.
Phi don ban ong eiei?