KA JINGLEHKHUID: Balei ngi dei ban lehkhuid?

Kong Linda Kongwang

Ngi lah juh iohsngew bunsien iakine ki kyntien ba ka jinglehkhuid ka wan ba ar hadien ka jingshakri Blei. Hynrei hato ngi la ju bud pyrkhing iakine ki kyndon ne ki nuksa babha ban leh khuid?.Bun naki briew kim ju pyrkhat hi ruh ban lehkhuid.

Ha ka jingshisha, ki don ruh katto katne ngut ki bym ju burom ia kito kiba ju pynkhuid iaki jaboh ne ki jakhlia ba don ha ki sawdong sawkun jong ngi. Ki don shibun ki jingpyrshah naka bynta ka jingbymlah ban lehkhuid. Iaka jinglehkhuid dei ban leh bad bud ryntih lang da baroh. Hangne ka jingthoh ka kdew shai balei ka jinglehkhuid kalong kaba donkam naka bynta ka jingkoit jingkhiah jong ka met bad naka bynta ka jingitynnad jong ka mei mariang.

KA JINGITHUH IAKA JINGLEHKHUID:– Haba ong ka jinglehkhuid ka mut ym don jaboh, jakhlia, dak tngit bad wat ka jingiwtung ruh. Ki dak jongka jinglehkhuid ki dei ka jingkoit jingkhiah, ka jingitynnad, ka jingjah noh ka jingbitar haba ymdon jingsma bad ban kiar naki jingsaphriang jongki jakhlia bad ban lait naka jingpynjakhlia ialade bad ia kiwei ruh. Da kaba leh khuid, phi lah ban ioh iaka met ka phad kaba koit ba khiah bad iaka jingkoit jingkhiah jong ka jingmut jingpyrkhat kaba lah ban pynsngew kmen ia phi. Ka jinglehkhuid ka kyntiew ban don iaka jinglong babha da kaba pynlong iaka met ka phad, ka jingmut jingpyrkhat bad ka mynsiem kaba khuid bad jai jai.

Ban lehkhuid bha kalong kaba donkam eh ban ioh iaka jingim kaba koit ba khiah namar ka dei tang daka jinglehkhuid hi kaba lah ban iarap kyntiew iaka main longbriew manbriew da kaba leh khuid hapoh iing bad shabar iing ruh. Ka dei ka jingkit khlieh jong baroh ban pynlong ialade bad iaki rud ki kiar kiba khuid ba suba bad ban long koit longkhiah bad ban lait na ki jingpang ba har rukom. Ka jinglehkhuid ka wanrah ruh iaka jingpyrkhat kaba bha bad shisha haka jingmut jingpyrkhat kaba lah ban pynduna ban ioh bunjait ki jingpang ne jingshitom haka bor met.

KA JINGDONKAM JONGKA JINGLEHKHUID:—Ka jingkoit jingkhiah bad ka jingkhuid jingsuba, ko don iaka bynta kaba khraw haka jingim ba man ka sngi jong ngi. Kalong kaba donkam namar ka iada iangi na bunjait ki jingpang kum ki Dengue,Typhoid, Hepatitis bad kiwei kiwei de ki jait jingpang ba saphriang naka jingshah dait haki ‘kain pyrjong.

Ki jait jingpang kum ki Jaundice, Cholera, Ascariasis, Ringworm, Scabies bad kiwei kiwei kilah ban saphriang naka daw ba bam iaki jingbam kiba jakhlia bad bym tap bha, ban dih iaki um jakhlia ne ban shong ban sah haki jaka bym i long koit long khiah. Ki jaboh ne ki synrum kiba lah ieh slem shi jaka ki lah ban pynsaphriang ia ki jingsma iwtung kiba lah ban wanrah jing eh haka jingkoit jingkhiah. Kan nang pyniwtung shuh shuh lada phim lah ban pynkhuid kloi iaki. Namar kata ka jinglehkhuid ka donkam bha naka bynta ialade, ha iing ha sem bad haki sawdong sawkun jongphi. [yn dang bteng]