Ka jingleh shiliang jong ki nongpyniaid ka pynkhyllem ia ka EC jong ka UDA: PN Syiem

Shillong:U bah PN Syiem, haba ia kren halor ka jingvote jong u pyrshah ia ka EC ba la ialam da u bah Teinwell Dkhar u CEM barim ka KHADC u la ong ba “ka jingleh shilliang jong u CEM bad u Symbud CEM ia ki katto katne ngut ki MDC ki ba hapoh ka UDA ka la pynkhyllem ia ka EC jong ki.”

U bah PN u la ong ruh “Naduh sdang hi ba ki thaw ia ka EC na ka liang ki NPP, MDC kim don ia ka jingsngewhun ia ka rukom pyniaid jong u CEM barim u bah Teinwell Dkhar bad u Dy CEM u bah PyniaidSing Syiem haduh ba kan da poi ka jing khyllem jong ka EC baroh kawei.”

“Katto katne bnai ruh ladon ka jingkwah mih seng noh jong ki katto katne ki MDC na ka UDA namar ba ka jingbym sngewiahap ia ki nongpyniaid hynrei hadien ka jingpynbeit jong ka High level Committee jong ka party kane ka jingmih seng ka la sangeh noh.”

“Ha kane ka jingialang jong ka High level Commitee ki la seng ruh ia ka Co-ordination Commitee ha ka ba u bah PN Syiem,u bah Paul Lyngdoh,u bah Gigur Myrthong , u bah Teinwell Dkhar ki la long ki dkhot ha ka Commitee, hynrei kane ka Commitee ruh ka long tang ka kyrteng namar tang shisien hi ki pynlong ia ka jingialang.”

“Haba la thaw ia ka Commitee ban sngap ia ki jingeh jong ki MDC, hynrei kata ka shu neh tang ha ka kyrteng.”