“Ka jinglaitim jong phi ka la jan!”

AIS Suja

Ong u Jisu – “Haba kine kiei kiei ruh ki sdang ban jia long, to khmied bad to mied ia la ki khlieh, naba ka jinglaitim jong phi ka la jan” Loukas 21:28.

Kiei kita kiei kiei? Ia kine kiei kiei u Jisu u la kren mynba u dang don ha pyrthei. Um kren tang ha ki synran hynrei u kren sha ka jaidbynriew Jiw bad sha kiba ngeit baroh.

Te hadien ba u Jisu u la kiew sha bneng kine kiei kiei ki la sdang ban jia hadien ba u la dep iathuhlypa ia ka jingpynjot ia ka Jerusalem. Shisha ka la jia: La ker kut ia ka Jerusalem da ki paid iapom, la pynjot ruh ia ka Temple kaba Ar ha u snem 70 A.D khlem da ieh noh maw halor u maw da ki shipai Rome hapoh ka jingialam u Titus u Patsha ka Hima Roman.

To khmied bad to mied ia la ki khlieh ka mut to khmih to bishar bniah to buddien ba ka por ka jingwanpat u Jisu ka la jan. namar u Jisu un wan ban pyllait ban bishar ban synshar ha ka jingsuk ha kane ka pyrthei.
Kumta, hadien ka jingpynjot ia ka Jerusalem ki Jiw (Israel) ki la mad ia ka jingtim ba shyrkhei (Cursing) na ka daw ka jingbymkohnguh ia u Blei. Deuteronomi 28:15-68. Ha kata ka por, ki Jiw ki don ha ka ingiapthngan ba jur kat haduh ba ki la ia bam doh ia la ki khun. Deuteronomi 28:54-57. Ha kata ka por, ki Israel ki la iap ha ka waitlam haduh 11,00000 (Khadwei Lakh ngut), 100000 ngut (Shi Lakh) la ialam mraw (Slaves) shapoh hima Rome bad sha kylleng pyrthei. Deuteronomi 28:63-64. La ieh iing jah ia ka Jerusalem naduh ba la pynjot thiaw ha u snem 70 A.D. Mathaios 23:38. Ki Hima Jentil ki la iuh top ia ka Jerusalem ha u 70 A.D, bad kane ka dang iaid mynta tad ynda pynkut noh ia ka jingsynshar ki Jentil.
Ki hima Jentil ki la pynjot thiaw ia ki Jiw hapoh ka jingsynshar jong ki. U Adolf Hitler ka Germany, u Nongsynshar lahduh (Dictator) u la pyniap haduh 60,00000 (Hynriewphew lakh) ngut ki Jiw ne Israel. Kane ka pynurlong ia ka jingong u Jisu “Kin kyllon da ka syrti waitlam” Loukas 21:24. Kine ki long kita kiei kiei ba u Jisu u la kren halor ki Israel ki la jia bad dep jia. La lum pat ia ki Jiw da ka thma bah ba Ar, ha u snem 1939 – 1945 na kylleng sawdong ka pyrthei, ki la leit phai sha la ka Ri ki Kpa Tymmen jong ki hyndai (their fore fathers) kata hadien 1878 snem naduh 70 A.D haduh 1948 A.D. ki Israel ki la man roi bad khlain bor kum ka jaid bynriew barit mynta kumba 71 snem.
Na kine kiei kiei, ka pyni ba ka ia ki Jentil ka la jan ban kut noh ryngkat ka ia ka jingsynshar u ksuid ia kane ka pyrthei na Jerusalem kumba 3 snem 7 bnai ne 1260 sngi = 1290 sngi, u ksuid un synshar. Daniel 12:11.
Kumta shwa na u Jisu un wan sha kane ka pyrthei kin don ki dak ha ka sngi u bnai bad ki khlur. Jingpynpaw 8:12. Ka jingjynjar ki jaidbynriew ha pyrthei. Mathaios 24:15-21. Ka jingkyrhuh duriaw bad at phyllung, ki briew ki sheptieng ki iapler naba yn pynkhih ia ka bor ki bneng. Loukas 21:25-26.
Hadien kine kiei kiei, u Jisu un paw ha suin bneng, un wan ha u lyoh. Ki kam Apostol 1:11.
Ki dak phylla kin sa paw ha pyrthei katba ka jingwan u Jisu ka nangjan. Ka jinglaitim kiba ngeit ka la jan. Ka jinglaitim ki Jiw ka la jan, kin sa iohi ia u Jisu markhmat bad kin tip ba u dei u Messiah (Mesaia) jong ki ia uba ki la kyntait, hangta kin ia iam rangbah rangsan namar jong u. Ha kata ka sngi kan don ka jingiam briew bakhraw ha Jerusalem. Sekharaiah 12:10-11.
Kiei kiei ki la dep jia bad nangiai jia. “Ka long ka por kaba khadduh” 1 Ioanis 2:18. “Kaba kut kiei kiei ka la jan kein” 1 Petros 4:7.