“Ka jingkyrshan ia U Saleng, kum u shabuk liang pyrshah, dei ka rai shimet jong U Bah Ardent”

Shillong:U bah Heavingstone Kharpran, Secretary Parliamentary Party jong ka seng VPP, ula thoh mynta ka sngi sha u Thomas Sangma, uba dei u lamphang dorbar jong ka dorbar jylla, ha kaba ula pynpaw, ba ka seng, ka sngew wit shibun eh ha kaba la wan rah ia ka kyrteng jong ka seng, ha kaba iadei bad ka jingjied ia u nongialam liang pyrshah, ha ka dorbar jylla.

U bah Kharpran, ula ong “Ka seng jongngi, kam don bynta eiei ruh em, ha kaba iadei bad ka jingjied jongphi, ia u nongialam liang pyrshah. Ka jingkyrshan jong U bah Ardent Basaiawmoit, ia U Saleng A Sangma, kum u shabuk rangbah jong ki liang pyrshah, kam dei ban don jingiasnoh ha kaba jied ia u nongialam jong ka liang pyrshah, namar ba ia katei (U bah Ardent) ula shim ha ka rai jongu shimet, halor ka jingkyrpad eh jong U Saleng A Sangma” ong ka kyrwoh na U bah Kharpran.