Rev.B.P.Pohsngap
Ka khubor “Jingkylla kaba mut“ bad ka khubor “ka jingkhuid”, ki long kiba khraw haduh katta katta. Ki long kiba ngi dei ban wad ne sliang ia ki khamtam ban ia ka spah kaba kordor.
Kine ki long ki lynti kiba U Blei U kwah eh ban iohi ba ki briew ki dei ban pdiang namar ki long ki lynti kiba ma U hi U la buh ia ki na ka bynta u briew. U briew baroh u don shabar ka hima U Blei, katba u dang sah khlem pat “kylla kaba mut” bad un nym lah da lei lei ban long “uba khuid” khlem pynkhuid na ki pop baroh. Ka ktien U Blei ka ong “namar baroh ki la leh pop, bad ki la duh lehnohei ia ka burom ka jong U Blei” (Rom 3:23), hynrei da ka jingieit bah ka jong U Blei; U la phah ia la U Khun ba marwei ban wan ban kit ia ki pop baroh. Ka Gospel u Ioannis 3:16 ka ong “U Blei U la ieit katta katta ia ka pyrthei katba U la aiti noh ia la U Khun ba la kha marwei ba uei uei ruh uba ngeit ha U, un nym jot shuh , hynrei un ioh ia ka jingim bymjukut”. Katto katne ki mat ba ngin ia kren ia ki jingkylla kaba mut, ka ktien nongwei (Gr) ka ong “Metanoia” (Repent) ba kit ia kine ki jingmut (1) kylla noh ka jingmut jingpyrkhat (a change of mind) (2) ka jingkylla na kaba sniew sha kaba bha (change of mind from evil to good or from worse to better).
Ka jingkylla kabamut ka don ha ka ia ka bor kaba khraw haduh katta katta. Ka lah ban pynkylla kaba mut wat ia U Blei haba kylla shisha na kaba sniew sha kaba bha. Ka jingkylla kabamut ka dei kawei na ki jingleh, kaba ktah ia ka dohnud jong U Blei, ba Un pynkylla noh ia kaba U la thmu, wat haba U la dep thmu ban pynjot ia kaba U la bitar shla. Ka kitab u Jonah 3:10 ka iathuh, ba U Blei U la bitar shla haduh katta katta ia ka Ninebeh kat haduh ba U la ong, “ Sa sawphew sngi te ia ka Ninebeh yn pynkyllon”. Ka long kaba sngewkmen ban tip, ban iohi ia ka bor jong ka jingkylla kaba mut kaba lah ban pynkmen ia U Blei shisyndon, ban sangeh ia kaba U la lah Pynbeit. Ka ktien U Blei ka ong “ Bad U Blei U la iohi ia ka jingleh jong ki, ba ki la phai noh na ka lynti ba sniew, bad U Blei U la kylla kabamut na kata ka jingsniew, kaba U la ong ba Un leh ha ki. Te Um shym la leh ia ka “. Mynta to ngin ia puson bad pyrkhat, kaei ka bor kaba pynlong ia U Blei ba Un kylla kaba mut? (1) ka jingsngewsih da lade hi ia kaei kaba la leh, lane haba la bishar bha ia kaba leh pleng ka long kaba pyrshah ia ka mon U Blei bad hangta ka wan ka jingsngew hi marwei marwei bad ha kaba kum kata ka por, u briew u lah ban shim rai ban kylla kaba mut. Ka shithi kaba ar sha ki nong Korinth 7:10 ka ong kumne, “ Namar kata ka jingsngewsih ba riewblei ka pynlong ia ka jingkylla kaba mut sha ka jingpynim ka bym babe shuh, hynrei ka jingsngewsih ka jong ka pyrthei ka pynlong ka jingiap”. Kane ka long ka por kaba khot ia phi ia nga ban puson ban pyrkhat ioh ngi la dep pynkthang, pyniam, pynsngewsih ia I mei ia I pa, ia kiba ha iing ha sem, ia ki para marjan marpa ba lada ngi la shem ialade ba ngi la leh kumta, kylla kaba mut kloi kloi ioh lap ba dier ka por, ka somon na U Blei ka wan ioh duh ei ia ka jingim bymjukut. U Blei Uba dap shisha da ka jingieit khraw ba lada shilynter ngi sah ha ka jingsniew hynrei tang ha ka shikhyllipmat haba phai sha U, U klet bad U map phar. Ka shithi kaba nyngkong u Ioannis 1:9 ka ong, “Lada ngi phla ia ki pop jong ngi, U long Uba iaineh bad Uba hok, ban map noh ia kita ki pop jong ngi bad ban pynkhuid ia ngi na ka bymhok baroh”. Ka jingkylla kabamut ka dei u mawjam ban poi sha ka jingkhuid. Wat tang ha kane ka jingim,, kata ha ka met, ,lymda ngi sum ngi sait, phim lah ban ia shong jan namar ka bor jong ka jingtngit ka pynsma iwtung ia u, hynrei uba sum uba sait, u itynnad i khuid, u i long riewshai ha ka jingim.
Kaei ka jingkhuid?
Kane kaba ngin ia kren mynta ym dei ia ka met, hynrei ia ka mynsiem. Ka ktien jingkhuid (Holy) ka wan na ka ktien Greek “ Hagios” kaba kit ia kine ki jingmut harum (i) Buh kyrpang (set apart) (ii) Ba la pynkyrpang shisha (Sanctified) (iii) Ba la pynkyntang ba la aiti na ka bynta U Blei (Consecrated). Lada kine ki don ha u briew, khlem artatien uta u briew un dei shisha u briew uba la don ha kata “Ka jingkhuid”. Ha kaba iadei bad ka jingkhuid wat la ki don shibun hynrei nga kwah ban kdew katto katne ki bynta (i) Ban long ki briew kiba kyntang. Kane ka dei ka jingkwah jong U Blei ia ki briew baroh bad dei na kata ka daw U la ai ia kane ka hukum ha ka kitab Lebitekos 11:44. Ka ong kumne, “Naba nga long U Trai U Blei jong phi; namar kata to pynkyntang ialade, bad phin long kiba khuid, naba nga long Uba khuid..” Na ka liang jong u briew hi ka donkam tang ban kohnguh beit ia kaei kaba U Blei U la ong (ii) Ban long kiba phikir bha ban nym bit tngit ha ka jinglong doh bad jinglong mynsiem. U Blei U la thaw ia ngi ki briew ban don ka met bad ka mynsiem, lada kam don ka met yn nym don ka mynsiem ka jingim bad lada kam don ka mynsiem ka jingim, yn nym don ruh ka met. Ngi la iohi da la ka jong ka khmat ba lada la mih noh ka mynsiem ka met kam don jingmyntoi shuh. U Apostol Paul ha ka shithi kaba ar sha ki nong Korinth 7:1 u ong, “Namar kata haba ngi don kine ki jingkular, ko ki hep to ngin ia pynkhuid noh ialade na ka jingbit tngit ka doh bad ka mynsiem baroh, da kaba pynjanai ia ka jingkhuid ha ka jingsheptieng ia U Blei”. Sa shiphang ban pynkut ia kane ka bynta, to ngin ia peit kaei ka jingbit tngit – ka doh bad ka mynsiem.
(1) Ki jingmut ki jingpyrkhat, ki jingleh ki jingthew, ki dap da ka jingsniew suda. U Isaiah Nongiathuhlypa ba khraw jong U Blei U la kren bad U la ong – 59:3-5, “Namar ia ki kti jong phi la pynsang da ka snam bad ia ki shympriahti jong phi da ka jingbymhok; ki rymmiang shyntur jong phi da ka lamler, u thylliej jong phi u la kren blom blom ia ka jingbymman…. Ki shaniah ha kaba thala, bad ki kren lamler, ki pun ia ka jingpynsniew, bad ki kha ia ka jingleh bymhok, ki pdem ia ki pylleng u bsein bad ki thain ia ki snur thapbawa, uta uba bam ia ki pylleng jong ki u iap, bad ia kata kaba la khniot la kylla seinpuh”.
(2) Kaba pyntngit ia ka kyrteng U Trai . U Esekiel Nongiathuhlypa u ong – 43:8 “Ki buh ia ka phyllaw jong ki hajan ka phyllaw jong nga, bad ia ka shawkad jingkhang jong ki hajan ka shawkad jong nga, bad la don tang ka kynroh hapdeng jong nga bad ki, bad ki la pyntngit ia ka kyrteng Bakhuid jong nga da ki jingijli jong ki ia kiba ki la leh, naba kumta nga la pynduh khoit ia ki na ka jingbitar jong nga”. Kane ka dei ka dak ba ki briew ki leh kum kiba riewblei, hynrei ka jingiadei bad U Blei pat kam long ei ei ka jingshisha, ki pynpaw tang nabar kumba pushara nalor
(3) Ki kam sniew ba bun jait kiba u briew u leh : U Jisu U kren ia kane, ka Gospel U Markos 7:20-23 ka ong “ U la ong ruh, kata kaba mih noh na u briew, kata kein kaba pyntngit ia u briew, naba na shapoh , na ka dohnud ki briew , ki mih noh ki jingmut bymman, kiba klim, kiba iakai kynthei, kiba pyniap, kiba tuh, kiba kurup, kiba pynsniew, kaba arsap, kaba nuti, kaba khwan lalot, kaba khmih sniew, kaba kren bein, kaba sngewkhraw bad kaba leh bieit. Kine kiei kiei baroh ki bymman ki mih noh na shapoh ki pyntngit ia u briew”.
Haba ngi pule ia ki khubor ba kren na ka ktien jong U Blei, to ngin puson ialade marwei marwei, ngi long kumno , ngi im kumno, ka ktien U Blei ka khot ia ngi sha ka jingkylla kabamut bad sha ka jingkhuid, na kine ar ki bynta, kiba iadei bad ka jingim kaba lawei sha bymjukut… AMEN…
ka mut aiu hagios, shadrack na ka ktien ka Jong u Blei ?