Ka jingkular ki seng sain pyrthei, ka dei ka bynta synshar paidbah, ong U CEC

Shillong:U Chief Election Commissioner (CEC) jong ka tnat Election commission of India (ECI) ha ka sngi thohdieng ka 13 tarik kyllalyngkot, u la pynshai haba ia dei bad ki katto ki skhim ba ki seng saiñ pyrthei ki la tyrwa bad ai sha ki paidbah nong shong shnong jong ka jylla kam dei satia kaba pynkhein ia ki ain kiba la don. Ka jing pynshai halor kane ka bynta ka dei hadien ba la iohi ia ki skhim kum ka FOCUS, ba la pyllait da ka sorkar NPP sha ki paid nongrep jong ka jylla ba kin ioh ia ka pisa jing iarap bad ka jingiarap pisa ba la tyrwa da ka parti liang pyrshah ka Meghalaya Trinamool Congress sha ki paidbah jong ka jylla kaba la tip kum ka WE Card ka ban ai jingiarap ia ki longkmie bad ka MYE Card ka ban ai jingiarap ia ki samla khlem kam khlem jam ha ka jylla Meghalaya.

Haba ia dei bad kine ki skhim, u Rajiv Kumar, u la ong ba kine ki skhim kiba la kular da kine ki seng saiñ pyrthei kim dei satia kiba pynkhein ia ka aiñ kaba lah don lypa, hynrei ka dei beit shi bynta jong ka riti synshar paidbah ban kular ia ki paidbah bad ki paidbah ruh ki dei ban tip kaei ba ki nong kular ki la kular.
U la ong ruh ba ka don ar bynta, kawei ka long ba ka jing kular jong ki seng saiñ pyrthei sha ki nong thep vote, ka dei ka hok jong ki seng saiñ pyrthei bad ka dei pat ka hok jong ki nong thep vote ban tip ia kaei kaba ki seng saiñ pyrthei ki la kular, lada dei ba shu kular ne yn pyntreikam ia ki jingkular, la ong u Kumar.

U la ong ba katba ka Model Code of Conduct (MCC), ym pat shym la pyntreikam, yn hap ban peit bniah bha, haba iadei ban ai ia ki jingbit bad ki jing bthah na ka liang jong ka tnat elekshon, la ong u khlieh duh jong ka tnat elekshon ha ka ri.

Haba iadei pat bad ka jing bym pat phah jong ka parti National People Party (NPP) ia ki jingkheiñ jing diah kaba ki la pynlut ha ka elekshon ba ladep u Rajiv Kumar, u la ong ba ki la dep phah ia ka jingthoh haba iadei bad ka jing kheiñ jingdiah ba ki la pynlut ha ki elekshon bad ym dei ruh tang ka parti NPP, hynrei ki don bun byllien ki parti ki bym lah ban phah ia kum kine ki jing donkam sha ka tnat ba dei peit.

Haba iadei pat bad ka jingujor pyrshah ia u myntri sorkar jylla ba ka don ka jing sam pisa ha ki bynta jong ka Nongkrem constituency, u CEC u la ong ba ka jing ujor kam don satia ha ka jing khmih ka jong u, hynrei lada ki don ki jing ujor pyrshah ia kino kino ki kyrtong ki seng saiñ pyrthei, la bthah ia ki DEO ba kin shim jingthoh bad ban ai jubab, la iathuh u Kumar.