Shillong,7 Naitung:
“Ka jingkhot Tender ka Uranium Corporation India Limited ban trei ia ki kam pynroi jong ka kaba la mih ha ki kot khubor, ka pyni shai kdar ba ka dei ka jingthmu ban tih Uranium” ong u President Rangbah ka KSU u samla Daniel Khyriem haba ia kren bad ki nongthohkhubor mynta ka sngi. Utei u nongialam ka KSU u la ong ba katkum ki kyndon ka UCIL ka dei ban ioh jingbit na ka sorkar jylla ne ka District Council hynrei tang ka jingbit ruh kam pat ioh kala iaid lait pynban ia kitei ki ar tylli ki bor da kaba khot tender lyngba ki jingpynbna paidbah. “Kitei ki kam pynroi baroh ki dei tang ka jingpynbiej tang ban ioh tih ia u Uranium, ka jingkhot Tender ka dei ka ajenda barieh jong ka UCIL ban khlong ia u Uranium” ong u samla Daniel.
Halor katei ka jingiaid lait ka UCIL ia ka sorkar jylla bad ka District Council u samla Daniel u la ong ba ka KSU ka dawa na ka sorkar ba ka dei ban pynsaja ia ka UCIL bad u la kyntu ruh ia ka sorkar jylla bad ka District Council ba kim dei ban ai NOC da lei lei ruh ia ka UCIL na ka bynta ban trei ia ki kamp pynroi ha South West Khasi Hills. Ha kajuh ka por u la ong ba ka KSU kan sap hah noh da ka jingthoh lashai ka sngi sha u myntri rangbah ka jylla u Dr.Mukul Sangma ban pan jingshai kaei ka nongrim ba ka sorkar jylla ka ieng ha kaba ia dei bad ka surok 2 Lane na Nongstoiñ sha Wahkaji.
Haab kren shaphang ka jingmih ki nongdawa ban pynpaw ba ki kwah surok na ka bynta ki kam pynroi u samla Daniel u la ong ba kan bha ban dawa na ka sorkar ban pynbha ia ki surk Single Lane kiba la don lypa , “Kam don nongrim balei katei ka thaiñ ka ioh ia ka 2 Lane (Double Lane) haba ki don tang kumba 4 ne 5 tylli ki kali kiba iaid ha ka shisngi, kaei ka nongrim jong ka Ministry of Road and Transport halor kane” u la ong.
Katba u General Secretary ka KSU pat u samla Auguster Jyrwa u la ong “Balei ym ai 2 Lane ia ka surok na Mawphlang sha Balat ka surok kaba ki kali ki iaid manl aka minit, ka ijngkhot Tender ka pyni shai kdar ba ka dei ka jingkwah ban tih Uranium,ngi kyntu ia kiba kwah surok ba ki dei ban kylla kaba mut noh ,ngi kyntu ia ki sordar,ki sengbhalang kiba kyrshan ia ka jingkwah surok ba kin mih shakhmat bad iatreilang bad ka KSU ban dawa na ka sorkar ba kan siang rong shuwa ia ka surok kaba la don lypa” ong u samla Auguster Jyrwa.
Haba phai sha ka jingktah u Uranium ia ka koit ka khiah u samla Daniel u la ong ba ka jingkhot Tender ka UCIL ka dei ban tih lyngba kata ka Open Gas Mining bad katei u la ong ba ka dei kaba don jingma na ki pui pui bad ki lyerbih. U President ka KSU u la kob ruh ba lada don ki stad saian kiba batai ba kam ktah ia ka koit ka khiah u long uba la kloi ban ia kren bad ki bad ki dei ban pynthikna ha kano ka dur un ym ktah ia ka koit ka khiah bad da kano ka rukom tih Uranium ka ban ym ktah ia ka koit ka khiah.
Khyndiat sngi mynshuwa u MP ka Shillong Parliamentary Konstitwensi u Ma Vincent Pala u la pynpaw ba u kwah ba ki paidbah kin ioh ia ka surok, haba la kylli na ki nongialam ka KSU halor kane ka jingpynpaw u MP ka Shillong u samla Daniel u la ong “Ngi kyntu ia u MP ba u dei ban peit kaba kumno ka kam pynroi kaba wan bad ka dei ha kano ka bynta, ngi la ju pyrta ba ngi donkam ia ki briew jong ngi kiba lah ban pynsawa ha Delhi” pynkut u samla Daniel Khyriem haba ia kren bad ki nongthohkhubor. Ha kawei pat ka khubor, ka FKJGP ka pyrshah jur ia katei ka jingpynbna Tender ka UCIL bad katei ka seng ka la kyntu ia ka KHADC ba kam dei ban ai NOC dalei lei ruh na bynta ka jingshna surok.
Phi don ban ong eiei?