Ka jingkhot pakhang shnong nyngkong, ka long beain ha New Zealand

Ka high court jong ka New Zealand, ka la pynmih ia ka hukum jong ka hynnin ka sngi, ha kaba ka la khein beain, ia ka jingkhot pakhang shnong kaba la pynlong nyngkong ha katei ka Ri. Katei ka dei ka pakhang shnong, kaba la khot ia ki paidbah, ban ia shong khop ha iing, na ka bynta ban khanglad ia ka jing ia bit jong ka jingpang corona virus.

Uwei u riewsaid, U Andrew Borrowdale, ula ujor ia ka pakhang shnong, kaba la pynlong naduh ka 26tarik Nailar haduh ka 3tarik Iaiong 2020, ha kaba la pynbna paidbah da ka Jacinda Ardern, ka myntri rangbahduh jong katei ka Ri.

Ki nongbishar baroh lai ngut, ki la pynbna, ba katei ka hukum, ka long kaba bakla, ha kaba la pynbor ia ki nongshong shnong jong ka Ri, ba kin shong kin sah ha iing, ha kitei ki sngi pakhang shnong. La iathuh ba ia katei ka ain, kaba dei ban pynshong iing ia ki paidbah, ym pat pynlong ain satia, da ka sorkar jong katei ka Ri, haduh ka 3tarik Iaiong 2020 bad kumta ka kashari, ka shim ba ka jing pynshong iing na ka bynta kitei ki 9 sngi kiba sdang, ka long kaba beain bad kam iaid satia, katba kum ka section 5 jong ka New Zealand Bill of Rights Act, ong ka kashari.