Ka jingkhot hajir, ka bym lah satia ban pdiang, ong ka HNLC

Shillong:U nongbishar jong ka kashari, kaba tohkit, ia ki mukotduma jong ka National Investigating Agency (INA), ula pynmih hukum, ba ki nongialam jong katei ka seng, kin leit ban shah bishar ialade.
Kane ka jingleh, ka dei ka jingleh tam jong ki bor sorkar, ia ka jingiakren iasuk, kaba dang iaid shakhmat, ong ka khubor jong ka seng.

Ha shwa, ka jingsdang jong ka jingiakren iasuk bad ka sorkar, ka HNLC, ka kren shai, ba baroh ki jingshah ujor kiba long pyrshah, ia ki nongialam jongki, ba dei ban weng noh, na ka bynta ban don ka jingsngew suk mynsiem, ha ka jingiakren ia suk, kaba dang iaid shakhmat bad ka seng, ka ong, ba ka sorkar, ka la pynthikna, ba shisien ba la sdang ka jingiakren iasuk, kumta ia ki mukotduma barim, ym dei ban don shuh ka jing iakren bad la ong shuh shuh, da ka seng, ba wat U Conrad Sangma, myntri rangbah ka jylla, lem bad U Ma Lahkmen Rymbui, ki la kren shai, ba ka jingkhot bishar jong ka NIA, kan nym pynthut satia ia ka jingiakren iasuk bad ka HNLC.

Ka seng, ka ong shuh shuh, ba haba ka jingiakren, ka dang iaid, katba ia ki mukotduma ba thymmai, yn pynngat ia ki nongialam bad kane ka pyni, ba ka dei tang ka jinglong arsap jong ka sorkar, kaba wan rah ia ka jing artatien bad ka jing bym shaniah shuh ha kane ka jing iakren.

Ka kyrwoh na U bah Sainkupar Nongtraw, General Secretary Cum Publicity Secretary jong ka HNLC, ka ong, ba ka HNLC, ka la sangeh, na ki kam iakren iasuk bad haduh mynta, kim pat ju leh ia kino kino ki kam, kiba pynthut ia ka jingiakren iasuk. “Ngi la iakren bun phew sien bad ki heh jong ka MHA bad ka sorkar jylla bad haduh mynta, la pynthikna iangi, ia ka suk ka sain, ka jing iatreilang, hynrei kane ka jingkhot hajir, ka dei ka bym lah satia ban pdiang” ong ka khubor jong ka seng.