Rev. B.P.Pohsngap
Para ri Para jaitbynriew, sa shisien pat nga wan sha phi, da ine i jingthoh barit ban pynkynmaw ban ai mynsiem, hapdeng ka saw ka sian kaba sngew ma bad sngew shyrkhei, kaba la pynkhynniuh niak ia ka pyrthei baroh kawei. Kane shisha ka dei ka jingkhih phaloh ka duriaw (tempest), kat ban tyllep ia ka lieng da “ka jingatphyllung“ (waves). Ka jingatphyllung kat kum ka ktien khasi tynrai, ka mut – “ u budlum jong ka um ba khih ba kiew ne rah shalor sla um”. Ym don ba lah ban neh lada u budlum ka um u la khih rad bah.
Kane ka jingpang mynta, ka ladei kawei na ki jingat phyllung kaba khraw shisha shisha, ngin leh kumno haba ka la wan jia kumta?. To ngin peit mynshuwa, Namar ba ki jingjia kiba la ju jia na ka por sha ka por, ki briew ha ka pyrthei ki mad ne ki ia kynduh (i). ka por U Elijah:- U Elijah u la pynlong lockdown da lade, mynba la beh mrad ia u da ka jesabel, ban pyniap noh ia u. napoh ka krem ba u la set kut ialade bun sngi bun por, 1.Ki syiem 19:11, “ Ha khmih U Trai U la iaid nangta, bad ka eriong kaba khraw bad kaba jur ka la kad ia ki lum, bad ka la pynpait lyngkhot lyngkhai, ia ki mawsiang ha khmat U Trai, hynrei Um shym don ha kata ka lyer: te hadien kata ka lyer sa kaba khynniuh jumai, …. Te hadien u jumai sa ka ding, bad hadien ka ding sa ka jingsawa kaba jai jai”., U Trai U la kren ia U Elijah da kaba ong, “ Me leh aiu hangne”?. U te U la ong, nga la sngewskuin na ka bynta U Trai U Blei ki pait, naba ki khun Israel ki la lyndet noh ia ka jutang jong Me…”
(ii.) Ha ka por U Job :- ka la wan lynshop ia ka ing jong U, Job 1:19, “ Te ha khmih ka lyer bah na ka ri khlaw ka la wan, bad ka la shoh ia ki sawdong jong ka ing te ka la hap halor kita ki samla, bad ki la iap”. Kane ka dei ka eriong ka jingtynjuh tang ia ka ing u Job hi.
(iii.) Ha ka por U Jonah :- Namar U Jonah U la leh lyndet ia U Blei Jon. 1:4, “ Hynrei U Trai U la pynmih ia ka lyer kaba jur sha ka duriaw, bad ka la don ka eriong kaba khraw, ha ka duriaw ba kumta ka imat kum ban pait”. Ka pop bad kaba lyndet ia U Trai, kaba leh ki bynriew ha ka pyrthei, ka wallam ia ka jingbitar U Blei kumba bitar ia U Jonah.
(iv.) Ha ka por ki Apostol :- kam. 2:13 – 20. “ Ka eriong na ryngkew ka hiar sha duriaw kaba kyrteng ka Iurokuila (Euroclydon) kiba shong ha ka lieng baroh ki la bret ia ki tiar ki tar baroh sha duriaw tang ban lait im ka mynsiem. “ Te mynba ka sngi lymne ki khlur kim paw shuh ha ngi bun sngi, bad ka eriong kaba jur ka la ban khia ha ngi, ka jingkyrmen ban im ka la duh noh”. Kane ka jingpang ba long kum ka eriong ba shyrkhei, bun kiba la don ha ka jingduh jingkyrmen ban dang sah ha pyrthei.
(v.) ki synran U Jisu :- Mt. 8:23- 27. Kine ruh ki la iakynduh ia kane ka jingatphyllung ba shyrkhei ha ka por jong ki, ki ruh ki la duh jingkyrmen ban im. “ Te ki la kyrsiew ia U Jisu”, Namar u don halor ka lieng, da kaba ki ong, “ KO KYNRAD TO PYNIM IA NGI: NGIN SA IAP”. “ U te U la ong ha ki, Balei ba phi long kiba sheptieng, ah phi kiba rit jingngeit? “ Ynda kumta U la khie U la sneng ia ka lyer bad ia ka duriaw ruh, te ka la long kaba jai jai eh”.
Halor kitei ki kyntien baroh ba la iohi ia ki nuksa jingjia ba shisha, kawei kaba nga iohi kaba don jingma ia kiba sheptieng shisha shisha, mutdur shisha pynleit jingmut bad sngi bad miet, lada rit jingngeit kan wan ka jingtieng bad kan jia ei ei kaba wallam jingsniew ia lade hi marwei marwei. Ka don ka jingjia kaba la jia ha u snem 2000, ba la sawa ne pynsawa ba u snem ar hajar, ka pyrthei kan sa wai. Kane ka la ktah ia kawei ka khun samla lud lehse 18 snem ei ei (nga mutdur). Ha ka 10.04.2000, iba ngi ia dei para marjan ing. Ha ka por step 9:30 am ei ei, nga la leit ha ing , ki la ialang ha kawei ka kamra baroh shi iing bad don katto katne kiba ia don lang ki para marjan ing hi. La khot ia nga, wan rung hangne pastor. Haba nga rung ngam ju iohi kum kata shisien ruh ha ka jingim. Ita I khynnah samla, I la kren ia iwei pa iwei kiba don hangta, da kaba ong bad kdew kti, phi long ki nongpop, phi long u nongpop, baroh ki la Kohnguh bad I la duwai iwei pa iwei, bad kaba ong, ki juh ki ktien. Nga la rung ha kane ka kamra, ban mih ruh ym long shuh ba la Kohnguh ban rung, ban shu mih la sngew lehrain Namar nga dei u rangbah. Nga la peit bha bad sngap bha bad ia ka pali ban poi ha nga. Ha shuwa ban poi ha nga, nga ithuh ia ka dak u mynsiem bymman ba u don ha kane ka khynnah samla, haba I duwai ia iwei I ba bah khun ha syndah jong nga. Katba I dang duwai ia ka kmie, ita I khun ba dang 10 bnai ei ei, I ktah ia I na khlieh, I kynhied ia I da kaba ong, shish u bymman, hangta hi nga shai ka mynsiem ba dei u bymman uba ialam ia I ban long kumta. Ynda poi ka pali jong nga, I ong, Phi U Shakri U Trai ngan duwai ia phi ruh mo. Nga skhem ka jingngeit nga ong To duwai, I la duwai mar ia dep I la shong ha mula, bad nga la ong ia I, Thei ngan duwai ia phi mo?, I ong to pastor duwai. Nga la ieng joit, bad nga la dumok da kaba ong, lada dei kane kaba wan na U Blei, to kan paw ka burom U Trai, hynrei lada dei u bymman kan jah noh shi syndon. Ha ka kyrteng U Jisu Amen. Mar ia dep duwai , I la weng ia u sniuh rangew rathai na khlieh, bad I la ong, ani ka shit bha mo!, hangta nga la ong ia kita baroh ba ia don hangta ia ia mih noh baroh ia leit la ki kam ki jam lah sngi, kumta la ia mih noh baroh. Nga bteng ban shong tang bad I kmie bad kylli balei ka long kumne kane ka khun?, I ong naduh mynmiet haba I wan sha ing, la iathuh khana tang shaphang kata ka ban wai ka pyrthei, hangta nga la sngewthuh ba I la sheptieng palat ka ktah ia ka bor pyrkhat. Ai nguh I’u Blei ba I la ioh jingkoit noh ha kata hi ka por, Iaroh I’u Trai.
Paralok baroh,kynthei bad shynrang, wat sheptieng, U Blei U ba im ma U hi U ban iada ia ngi na ki jingma, dem duwai, kohnguh ia kaba la pynbeit da ki bor halor jong ngi baroh, shen shen ka covid-19, kan jem noh jai jai kum ki synran haba ki la phai sha U da kaba dem duwai:
To iai duwai; jingduwai ka lah,
To iai duwai; U Trai um iehnoh;
To iai duwai; bat kular U Trai;
To iai duwai; Un jubab ia phi.
Phi don ban ong eiei?