Ka jingkhang tih dewiong, kam long kum ka riti synshar, ong u Bah John

Shillong, 28 Jymmang:
Ki khlieh nongsyn shar kane ka jylla ki la takrain tyngeh ia ka rai ka National Green Tribunal (NGT) ban khang ia ka jingtih dewiong thliew khnai ha kane ka jylla bad ki la ong ba ka long pyrshah ia ka riti synshar ka ri.
Haba kren sha ki nongthoh khubor hynne ka sngi Balang,u chairman ki khlieh nongsynshar u Bah John F Kharshiing u la ong ba ki khlieh nong synshar ki la sngew artatien jur ia ka hukum ka NGT ban khang ia ka jingtih dewiong thliew khnai ha kane ka jylla namar ba katkum ka riti synshar ka ri, ki jaka ki puta ki khyndew ka shyiap, ka dei jong ki riew shimet.
U Bah Kharshiing u la ong ba ka jingwan tuklar ka NGT ka long ka bym dei katkum ka riti synshar ka ri namar ba ka pynkhein ia ka soskular ia ka jinglong trai jong ki briew kane ka jylla ia ka khyndew ka shyiap.
Ha kajuh ka por, u la pynkynmaw ba ki paid bah kane ka jylla ki la pyrshah ia ka Coal Mines Nationalisation Act 1973 kaba la kren ia ka jingshim jaka jong ka sorkar kaba dei jong ki riew shimet.
“Ngi sheptieng ba kane ka lah ban knieh pynban ia ki jaka puta jong ki briew kane ka jylla da kane ka jingwan tuklar ka NGT” la ong u Bah Kharshiing.
U Bah Kharshiing u la iathuh ba ka sorkar pdeng ha u snem 1993 ka la ai wai kumba hynriew tylli ki jaka tih dewiong ha ki bynta bapher bapher jong ka Khasi Hills.
U la ai nuksa ia ki par ba la shim wai da ka sorkar ha u snem 1973, ha kaba ka sorkar ka la aiwai ia ka paw ha Borsora sha ka kompeni na Assam ka Bengal Company Limited (ABCL) bad bynrap ba ka sorkar ka la ai wai ia kawei ka par ha Sohra sha ka Cherra Chha tak Ropeway Company Limited.
“La iathuh ia nga la don ki jingker ha ka paw ha Borsora kaba la buh da ka kompeni”, la ong u Bah Kharshiing.
U la buh jingkylli, kumno ka sorkar pdeng lyngba ki ain jongka, ka lah ban kam trai ia ki jaka jong ki trai jylla bad ban aiwai sha ki kompeni namar ba ha kane ka jylla, ka don ka jinglong kyrpang ia ka khyndew ka shyiap jong ki riew shimet.
Shwa ia kane, ki khlieh nongsynshar ki la aiti ia ka dorkhas ha u Myntri Rangbah ka jylla u Mukul Sangma ban tuklar ia ka jingkhang tih dewiong ka NGT.