Ka jingkhang jong ka seng NPP ka iai plie beit ia kino kino kiba kwah wan rung sha ka seng, ong u Bah Prestone

Shillong: Hadien ba ki khubor kiba shisha ki la mih ba u MDC ka Malki Laitumkhrah Constituency, u Bah Fantin Joseph Lakadong ryngkat bad ki nongkyrshan jong u da kawei ka sur ki la rai ban pyniasnoh noh bad ka seng National People’s Party(NPP), ki khubor ki la her sawdong ruh shaphang ka kurim jong u kata ka Kong Ampareen M Lyngdoh kaba  dei ka MLA na katei hi ka Constituency bad kaba long ruh ka nongialam jong ka Congress Legislative Party(CLP) ba kan leit ban pyniasnoh lang noh bad ka seng NPP.

Ha kaba iadei bad kane na ka liang u Bah Prestone Tynsong u ba dei u National Vice President jong ka seng National People’s Party(NPP) bad u ba long ruh u Symbud Myntri Rangbah ka jylla u la ong ba ka jingkhang jong ka seng NPP ka dei kaba heh bad ka plie beit na ka bynta kino kino kiba kwah ban wan rung sha ka seng. Haba kren sha ki lad pathai khubor ha ka 4 tarik u bnai Rymphang 2022, u Bah Prestone Tynsong u la ong, “Ngi pdiang sngewbha lut ia baroh bad ka jingkhang jong ngi ka plie beit bad lada don mano mano kiba kwah ban pyniasnoh bad ngi ki lah ban wan namar ka iing jong ngi ka long kaba heh. Ngi pdiang sngewbha lut ia baroh kiba kwah ban wan pyniasnoh ialade bad ka seng NPP jong ngi.” Shuh shuh u Bah Prestone Tynsong u la ong ruh ba um pat ioh jingtip satia kaba tikna la ka Kong Ampareen M Lyngdoh kan wan shisha ne em ban pyniasnoh ialade bad ka seng NPP.