Shillong:U myntri ka tnad ri jingri ka jylla u bah AL Hek, mynhynnin ka sngi, u la ong ba ka jingkhang ia ka dohkha ne ia kano kano ka doh nabar jylla ka dei ban leh ka sorkar, ym da ka bor district, namar ba kane ka dei ka polisi ka sorkar.
Haba kren sha ki lad pathai khubor halor ka jingkhang wanrah dohkha nabar jylla, kumba la pynbna ka Commissio ner ka Food Safety, u bah AL Hek, u la ong ba kaba donkam ka long ba ka tnad Fishery ka dei ban ai jingtip shwa sha ka sorkar, halor ka jinglap ia ka formalin ha ki dohkha bad ka sorkar kan sa rai ban leh ia kaba donkam, la ka dei ban khang ne em ban wanrah ia ki dohkha nabar.
U la ong ba ym lah ban khang tang ia ka district ia kano kano ka marbam, hynrei kaba lah ban leh ka dei tang ka sorkar.
“Ka DC ka East Khasi Hills ka la leh ban khang ia ka jingwanrah dohkha nabar ka dei halor ka kaiphod ba la lap ka test na ka Commissioner ka Food & Safety. Hynrei kata, ngi ong ia ka DC, ba haba khang ia kano kano ka bam, kam lah ban long tang ha shi district ne ar district bad ia kata ka rai, dei tang ka sorkar kaba lah ban leh ia baroh ka jylla”, la ong u bah AL Hek.
Lah ban kdew ba ka Commissioner ka Food Safety, ka la khang ban wanrah dohkha haduh 15 sngi naduh ka 8 tarik mynta u bnai hadien ba ka test ka la lap ba ka la don ka jingkhleh dawai formalin ha ki dohkha, kaba la buh ka jingma ia ka jingkoit jingkhiah ki paidbah.
Ia ka hukum ba la pynmih ka DC, u la khot ia u Director ban iakren ia ka jingkhang wanrah dohkha nabar, namar ba lada kam long shuh ban wanrah marbam nabar, ka sorkar kan leh ia kane hynrei na ka liang ka DC ka la leh hadien ba la ioh ia ka kaiphod na ka Commissioner, ka Food Safety.
Phi don ban ong eiei?