Ka jingkhang dewiong ka ktah ia ka jingpule, ong ka Ri Lyngngam

Shillong,1 Jylliew:
Ka Ri Lyngngam Peoples Council, ka la pynpaw ka jingsngewkhia halor ka hukum ba kyndit ka National Green Tribunal, NGT ban khang tih dewiong, bad katei ka seng ka la ong ba katei ka jinghkang tih dewiong kaba kyndit ka la ktah ia ki pule puthi jong ki khynnah naba ka kam tih dewiong kadei kawei na ki lad pynmih pisa ba ki kmie ki kpa ki lah ban phah skul ia ki khun jong ki. “Haba la khang ia u dewiong la kumba khang ia ka jingpule” ong ka kyrwoh na ka RLPC kaba la pynpaw ruh ba katei ka hukum ka pynia kynduh jingeh ia ki kmie ki kpa kiba phah skul shabar ia ki khun jong ki, kaba donkam ban siew da ki lak tyngka. Katei ka seng ka la buh ruh ka jingkyrpad ia ki bor bahalor kum ka sorkar lyngba ka tnad Mining , ka KHADC, JHADC,GHADC ba kin shim khia ban pynbeit kloi ia katei ka kam bad ka NGT, bad ka la buh ruh ka jingkyrpad ia ka NGT ban weng noh ia katei ka hukum.
Ha ka jingialang jong katei ka seng kaba la long ha ka 20 tarik u jymmang ha nongbah Shillong ka la pynpaw ruh ba ka kam tih dewiong ka dei ka kam kaba la sdang la slem bah ha kane ka jylla naduh ka por ka sorkar phareng , kaba la sdang nyngkong ha Sohra bad bud pat sa ha Borsora ha ka por u Langngad Singh syiem , u Syiem ka Hima Langrin bad ha katei ak por la trei da ka M/S English & CO, bad da katei ka kompeni la pynmih karkhana dewbilat ha Sohra bad kumjuh ruh ka jingthnang shun, ka la ong ruh ba hadien ka jingphet noh ka sorkar phareng naduh u 1947, ia katei ka kam la bteng a ki trai jyla haduh mynta mynne.
Katei ka seng ka la pynpaw ruh, ba ka rai ka NGT ka long kaba pynia kynduh mawsiang ia ki nongkhaii bad ki trai par dewiong, kiba la shim ram na ki bank bapher bapher ban thied Trok, JCB bad kiwei pat ki jinghdonkam ha ka jingtrei dewiong.